Kongoda muxolifat namoyishlari arafasida internet va sms-xizmat o‘chirib qo‘yildi

Kongo Demokratik Respublikasi (KDR) hukumati davlat xavfsizligi nuqtai nazaridan mamlakatda o‘tkazilmoqchi bo‘layotgan aksilhukumat namoyishlari arafasida internet va sms-xizmatni o‘chirib qo‘yishni buyurdi. Bu haqda actualite.cd xabar bermoqda.

OAV ma'lumotlariga ko‘ra, 31 dekabrda KDRning yirik shaharlarida namoyishlar o‘tadi. Namoyishchilar prezidentni uchinchi muddatga qolish uchun konstitutsiyaga o‘zgartirishlar kiritishdan voz kechishga chaqirishmoqchi. Talablar orasida siyosiy mahbuslarni ozod qilish talabi ham bor.   

“Xavfsizlik nuqtai nazaridan va telekommunikatsiyalar haqidagi qonunning 46-moddasiga binoan, KDRda 30 dekabr soat 18dan boshlab yangi farmoyish chiqqunga qadar quyidagi xizmatlarni taqdim qilish to‘xtatiladi: sms, internet”, deb aytilgan mamlakat aloqa vaziri Emeri Okunjining bayonotida.

Bayonotga ko‘ra, taqiqlovni bekor qilish qarori 1 yanvarda qabul qilinadi.

Portalning ta'kidlashicha, internet va sms-xabarlarga taqiqlov KDRda yirik aksilhukumat namoyishlari arafasida muntazam joriy qilib kelinadi.