Test sinovlari bir necha kun davomida o‘tkaziladi, abituriyent o‘z natijasini o‘sha kundayoq biladi

2018 yilda O‘zbekistonda Oliy ta'lim muassasalariga kirish imtihonlarining maksimal darajada shaffofligini ta'minlash, jamoatchilik nazoratini kuchaytirish, shuningdek, test natijalarini tezkor e'lon qilishning zamonaviy mexanizmlari joriy etiladi. Bu muhokama uchun e'lon qilingan 2017−2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini «Faol tadbirkorlik, innovatsion g‘oyalar va texnologiyalarni qo‘llab-quvvatlash yili»da amalga oshirishga oid davlat dasturi loyihasida ko‘zda tutilgan.

Ushbu maqsadlar uchun davlat byudjyeti hisobidan 8,2 milliard so‘m mablag‘ ajratiladi.

Buning uchun normativ-huquqiy hujjat loyihasi va chora-tadbirlar dasturi ishlab chiqiladi. Loyihada test sinovi natijalarini test o‘tkazilgan kunda e'lon qilish shartligi belgilanadi. Dasturda oliy ta'lim muassasalariga kirish test sinovlarini bir necha kun ichida o‘tkazish, test natijalarini o‘sha kundayoq e'lon qilish, jamoatchilik, shu jumladan, abituriyentlarning ota-onalarining kirish imtihonlarini onlayn rejimda kuzatib borish imkoniyatini yaratishga oid tadbirlar amalga oshiriladi.