Qoʻshimcha qabul hududlardagi davlat oliy taʼlim tashkilotlarining bakalavriat taʼlim yoʻnalishlari uchun amalga oshirildi.
Tanlovda kirish imtihonlarida kamida 56,7 ball toʻplagan, biroq talabalikka tavsiya etilmagan qoraqalpogʻistonlik abituriyentlar ishtirok etdi.
Bunda abituriyentlar quyidagi talablarga ham javob berishi belgilangan:
davlat oliy taʼlim tashkilotining bakalavriat taʼlim yoʻnalishiga abituriyent sifatida roʻyxatdan oʻtgan boʻlishi;
roʻyxatdan oʻtish davrida doimiy yashash hududi Qoraqalpogʻiston Respublikasi boʻlishi;
Qoraqalpogʻistondagi umumiy oʻrta, oʻrta maxsus yoki kasbiy taʼlim tashkilotini tamomlagan boʻlishi.
Qoʻshimcha qabul parametrlarini shakllantirishda abituriyentlarning toʻplagan ballari ketma-ketligiga qatʼiy rioya qilingan.
Tanlov natijalari boʻyicha qaydnomalar qabulni belgilangan tartibda rasmiylashtirish uchun tegishli oliy taʼlim tashkilotlariga yuboriladi.
Abituriyentlar oʻz natijalarini my.uzbmb.uz saytidagi shaxsiy kabineti orqali yoki mandat.uzbmb.uz saytiga ID raqamini kiritgan holda bilishi mumkin.
