Самир Аббосов Тошкентдаги Озарбойжон Маданият Марказининг 2017 йилги сарҳисоби ва 2018 йилги режалари билан бўлишди
01:15 / 13.01.2018
2686

Ўзбекистон ва Озарбойжон мамлкатлари 2017 йилда кўп сонли катта лойиҳаларни амалга оширишди. Бу мамлакатлар минтақада ҳам, Ислом давлатлари орасида ҳам нуфузли ўринга эга бўлиб бормоқда, уларнинг билдирган таклифлари юқори даражада қабул қилинмоқда. 

Президент Илҳом Алиев томонидан юритилаётган муваффақиятли сиёсат натижасида Озарбойжоннинг тарихий ипак йўли қайта тикланиши, Боку-Тблиси-Қарс темир йўлининг очилиши иқтисодиёт ва туризм соҳасида янги имкониятларни кашф этади, дейди Тошкент шаҳридаги Ҳайдар Алиев номли Озарбойжон маданият маркази раҳбари Самир Аббосов. 

"2017 йилда Тошкент ва Бокуда гуманитар, айниқса маданият ва туризм соҳаларида кўплаб лойиҳалар ҳаётга татбиқ этилди. Ислом олами ҳамжиҳатлигига йўналтирилган халқаро тадбирлар, Самарқанд шаҳрида бўлиб ўтган "Шарқ тароналари" мусиқий фестивали, халқаро туристик кўргазма ва ярмаркалар - буларнинг бари мамлакатларимизнинг жаҳон саҳнидаги нуфузи ошиб бораётганидан далолат беради. Таъкидлаш жоизки, тарихий Самарқанд шаҳрида бўлиб ўтган "Шарқ тароналари" халқаро мусиқий фестивалида озарбойжонлик Соҳиб Пошазода энг юксак мукофот - Гран-прига сазовор бўлди. 

Бугунги кунда қардош Ўзбекистонда 40 минг нафарга яқин озарбойжонлик истиқомат қилади - улар икки мамлакат ўртасидаги дўстона кўприк ҳисобланади. Озарбойжонликлар Ўзбекистоннинг ижтимоий-маданий ҳаётида доим фаол қатнашиб келишади ва бу ўлкани ўз ватанларидек севишади.

Ҳайдар Алиев номини олган Озарбойжон Маданият Маркази икки қардош халқ ўртасидаги муносабатлар ривожи йўлида қатор лойиҳалар ва тадбирларни амалга ошириб келмоқда. Тошкент ва Самарқандда икки марта Озарбойжон маданият кунлари, шунингдек миллий ошхона фестиваллари, концерт дастурлари, кўргазма ва модалар намойиши ўтказилди. Самарқанд давлат университети қошида Озарбойжоннинг навбатдаги маданият ва адабиёт хонаси ташкил қилинди. Бундан ташқари, ватандошимиз Саида Ризо Ализода номини олган Озарбойжон-Ўзбекистон Дўстлик маркази ҳам икки мамлакатнинг дўстона муносабатларини фаол тарғиб қилиб келмоқда. 

Шу билан бирга, икки мамлакат ўртасида илмий, маданий ва адабий мавзуларга бағишланган конференциялар бўлиб ўтди. Марказимиз лойиҳаси бўйича Ўзбекистон халқ шоири Жамол Камолнинг 80 ёшли юбилейини кенг нишонладик. 

Ўзбекистонлик 12 журналист иштирокида "Медиатур" ташкил қилинди. Улар Озарбойжоннинг барча соҳаларда эришган ютуқларини кенг ёритиб боришди. Икки мамлакат жамоатчилигига Озарбойжон-Ўзбекистон дўстона муносабатлари ҳақидаги "Асл дўстона муносабатлар" ҳужжатли фильми намойиш қилинди. 

Озарбойжон Миллий Илмий Академияси институтлари ҳамда Ўзбекистоннинг илмий муассасалари, шунингдек туристик ассоциациялар ўртасида Меморандумлар имзоланди. Биринчи  марта талабалар ва докторантлар алмашинуви татбиқ этилди, кўплаб саёҳатлар ташкил этилди. 

Маданият Маркази лойиҳаси доирасида буюк озарбойжон шоири Низомий Ганжавийнинг барча асарлари ўзбек тилига ўгирилиб чоп этилди. Тошкентда Ганжавийнинг "Хамса"си нашрдан чиқди, шу билан бирга, шоирнинг "Сирлар хазинаси", "Лайли ва Мажнун", "Иқболнома" асарлари ҳам жамоатчиликка тақдим этилди.

2018 йилда Ҳайдар Алиев номли Озарбойжон Маданият Марказида кўплаб лойиҳаларни амалга ошириш режалаштирилмоқда:

Жорий йилнинг май ойида Тошкентда Озарбойжон Демократик Республикасининг 100 йиллигига бағишланган кўплаб тадбирларни ўтказиш режалаштирилмоқда. Ўзбекистондаги Маданият ва санъат инстиутида озарбойжонлик буюк бастакор Кара Караев номидаги "Озарбойжон Мусиқий ва Маданий маркази"нинг очилиши кўзда тутилмоқда. 

Навоий номли Тошкент Давлат Ўзбек тили ва адабиёти университетида Озарбойжон-Ўзбекистон Дўстлик марказини ташкил этиш, шунингдек Ўзбекистонда биринчи марта "Озарбойжон тили ва адабиёти" кафедрасининг йўлга қўйилиши кутилмоқда. 

Бундан ташқари, Ўзбекистоннинг тарихий шаҳарларидан бири бўлмиш Хивада "Озарбойжон маданият ҳафтаси"ни ўтказишни режалаштирмоқдамиз.

Маданият Марказининг навбатдаги лойиҳаси асосида "Озар-ўзбек" ва "Ўзбек-озар" луғатининг тайёрланишига старт берилди.

2018 йилда Маданият Маркази Ўзбекистоннинг туристик фирмалари вакиллари иштирокида «İnfotur» ташкил қилади. Қардош юртнинг туристик фирмалари вакиллари ва журналистлари Боку, Габала, Лохиж, Шеки, Ганжа, Ғусор, Набран каби саёҳлик марказлари билан танишишади.

Озарбойжон ва Ўзбекистон ипакчилик санъатига оид лойиҳанинг ҳаётга татбиқ этилиш кутилмоқда. Ўзбекистоннинг Марғилон шаҳрида ҳар йили анъанавий Ипакчилик фестивали ўтказилади ва биз бу йил унда ташкилотчи сифатида иштирок этишни кўзлаяпмиз.

Режалар кўп. Ишонаманки, мамлакатларимизда юритилаётган муваффақиятли сиёсат натижасида биз олдимизга қўйган мақсадларимизга эришамиз, дўстона ва ҳамкор муносабатларимизда янги марраларни забт этамиз", дейди Тошкентдаги Озарбойжон Маданият Маркази директори Самир Аббосов. 


Улашинг
Top