Kobuldagi mehmonxonada 40dan ortiq kishi halok bo‘ldi. Qurbonlar orasida xorijlik diplomatlar bor

Afg‘oniston poytaxti Kobul shahridagi Intercontinental mehmonxonasiga terrorchilar hujumi oqibatida qurbon bo‘lganlar soni 43 nafarni tashkil qilmoqda. Bu haqda Afg‘oniston maxsus xizmatlariga asoslangan holda mahalliy nashrlar xabar tarqatdi.

Shuningdek, 150dan ortiq kishi, jumladan 40dan ortiq xorijlik jarohatlangan.

Qurbonlar orasida Ukraina fuqarosi bor. Bu ma'lumotni Ukraina Ichki ishlar vazirligi tasdiqladi.

Shuningdek, bu hujum oqibatida halok bo‘lganlar orasida Afg‘onistonning Karachi shahridagi bosh konsuli ham bor.

20 yanvar kuni kechqurun Kobul shimoli-g‘arbidagi mehmonxonada konferensiya bo‘lib o‘tayotgan vaqtda 4 nafar jangari mehmonxonaga bostirib kirdi va odamlarni o‘qqa tutdi. Mehmonxonani terrorchilardan ozod qilish jarayoni 18 soat davom etdi. Keyinchalik terrorchilarning barchasi yo‘q qilindi, mehmonxona ichidagi 126 kishi ozod qilindi.

Ushbu hujum uchun javobgarlikni «Tolibon» o‘z zimmasiga oldi.