Maktabgacha ta'lim vaziri rahbarligida Toshkent shahar va Toshkent viloyati maktabgacha ta'lim boshqarmasi va tuman bo‘limlari xodimlari ishtirokida yig‘ilish o‘tkazildi. Bu haqda vazirlik axborot xizmati xabar bermoqda.
Yig‘ilishda Maktabgacha ta'lim muassasalarida sog‘lom ovqatlantirishni yo‘lga qo‘yish, tuman maktabgacha ta'lim bo‘limlari faoliyatini tashkil etish hamda tizimda kadrlarga oid hujjatlarni rasmiylashtirish va hisobini yuritish ahvoli atroflicha muhokama etildi.
Ta'kidlandiki, O‘zbekiston Respublikasi Prezidentining 2017 yil 9 sentabrdagi “Maktabgacha ta'lim tizimini tubdan takomillashtirish chora-tadbirlari to‘g‘risida”gi qarorning 3-bandiga ko‘ra Toshkent shahrida joylashgan davlat maktabgacha ta'lim muassasalariga tadbirkorlik sub'yektlari bilan sifat talablariga va sanitariya-gigiyena normalariga javob beradigan oziq-ovqat mahsulotlari va tayyor ovqatlarni yetkazib berish bo‘yicha to‘g‘ridan-to‘g‘ri shartnomalar tuzish ishlarini eksperiment tarzida amalga oshirish belgilangan. Bu borada faqatgina Sergeli tumanidagi 18-maktabgacha ta'lim muassasasida tarbiyalanuvchilarni ovqatlantirish bo‘yicha eksperiment o‘tkazish ishlari boshlanganligi ko‘rsatib o‘tildi. Ammo, Toshkent shahrining boshqa tumanlarida bu boradagi ishlarda sustkashlikka yo‘l qo‘yilayotganligi tanqid ostiga olinib, mutasaddilarga qisqa muddatda kamchiliklarni bartaraf etish yuzasidan ko‘rsatma va tavsiyalar berildi.
2018 yilning 13-14 mart kunlari Toshkent shahrida “O‘zekspomarkaz”da Maktabgacha ta'lim tizimida oziq-ovqat mahsulotlari va tayyor taomlarni yetkazib berish bo‘yicha to‘g‘ridan-to‘g‘ri shartnomalar tuzishni tashkil etish yuzasidan tegishli hamkor tashkilotlar bilan ko‘rgazmani yuqori saviyada tashkil etish yuzasidan ham vazifalar belgilandi.
Yig‘ilishda shuningdek, maktabgacha ta'lim bo‘limlari faoliyatini tashkil etish va kadrlarga oid hujjatlarni rasmiylashtirish hamda hisobini yuritish yuzasidan o‘tkazilgan o‘rganishlar ahvoli tahlil etildi. Jumladan, bu borada Olmazor va Shayxontoxur tuman maktabgacha ta'lim bo‘limlarida jiddiy kamchiliklarga yo‘l qo‘yilganligi ko‘rsatib o‘tildi hamda tizimida bu kamchiliklarni bartaraf etish yuzasidan tegishli topshiriqlar berildi.
Tadbirda Vazirlar Mahkamasining 2017 yil 19 iyuldagi “Maktabgacha ta'lim muassasalarining faoliyatini takomillashtirish to‘g‘risida”gi qaror ijrosiga alohida e'tibor qaratildi. Xususan, ayrim maktabgacha ta'lim muassasalarida hali-hanuz tuman maktabgacha ta'lim bo‘limi yo‘llanmasisiz bolalarni qabul qilish va saqlash holatlari mavjudligi, bolalar ta'minoti uchun to‘lanadigan tushumlar MTM hisob raqamiga kirim qilinmayotganligi hamda hisobsiz tarbiyalanuvchilar boshqa bolalar hisobidan ovqatlanayotganligi qattiq tanqid ostiga olinib, bu borada prokuratura organlari bilan hamkorlikni kuchaytirishga qaratilgan chora-tadbirlar belgilandi.
Yig‘ilishda ko‘rib chiqilgan barcha masalalar yuzasidan tegishli qarorlar qabul qilindi.
