Oliy Majlis Qonunchilik palatasining navbatdagi majlisida deputatlar qator qonun loyihalarini ko‘rib chiqishdi. Ular orasida – Soliq kodeksining 356-moddasiga tuzatishlar loyihasi, deb yozmoqda Norma.
Mazkur qonun loyihasi o‘tgan yilning noyabr oyi oxirida QHTBT portalida muhokama uchun taqdim etilgan edi. U turistik xizmatlarini onlayn bronlash va sotish bo‘yicha dasturiy mahsulotlar hamda axborot tizimlarini joriy etishga yo‘naltirilgan mablag‘lar summasini turistik faoliyat sub'yektlarining soliq solish bazasidan chegirib tashlashni nazarda tutadi.
Keyinroq Prezidentning 3.02.2018 yildagi PF-5326-son Farmonida 2018 yilning 1 yanvaridan e'tiboran turizm mahsulotlarini sotish va/yoki turizm xizmatlarini onlayn bron (band) qilish bo‘yicha xizmat ko‘rsatuvchi xo‘jalik yurituvchi sub'yektlarning soliq solinadigan bazasi elektron xizmatlarni, jumladan, elektron to‘lovlar, bron (band) qilish, ekvayring va boshqa xizmatlarni, shuningdek, turizm xizmatlarining zamonaviy turlarini taklif qiluvchi ixtisoslashtirilgan internet-saytlar va portallarni yo‘lga qo‘yishga yo‘naltirilgan xarajatlar miqdoriga kamaytirilishi mustahkamlandi.
Deputatlarning ta'kidlashicha, kiritilayotgan qo‘shimcha elektron tijorat infratuzilmasini joriy etishni hamda turistik xizmatlarni onlayn-bron qilish va turistik mahsulotlarni internet orqali sotish bo‘yicha xizmat ko‘rsatuvchi turistik faoliyat sub'yektlari sonini ko‘paytirishni rag‘batlantirishga xizmat qiladi.
Qonun loyihasini ikkinchi o‘qishda maromiga yetkazish doirasida tahririy tuzatishlar kiritildi. Rossiya, Belorussiya va Gruziya kabi xorijiy mamlakatlar tajribasi takroran o‘rganildi. Shuningdek parlament fraksiyalarining takliflari va tavsiyalari hisobga olindi.
Ularning fikriga ko‘ra, ushbu qonunning qabul qilinishi mazkur sohada ko‘rsatilayotgan xizmatlar sifati va tezkorligini oshirishga, shu jumladan axborot-kommunikatsiya texnologiyalarini faol joriy etish yo‘li bilan oshirishga, turistik xizmatlar narxini pasaytirishga, raqobatni rivojlantirishga xizmat qiladi.
