O‘zbekistonda amalga oshirilayotgan keng ko‘lamli islohotlar ichki ishlar organlarining xizmat faoliyatida ham o‘z aksini topmoqda. Sohada o‘tkazilayotgan islohotlar natijasida bugun Toshkent viloyati ichki ishlar organlari xodimlari va keng jamoatchilik o‘rtasidagi hamkorlik aloqalari tobora mustahkamlanib bormoqda, barcha soha vakillari bilan yelkama-yelka turib, yurt osoyishtaligi va fuqarolar xavfsizligi yo‘lida xizmat qilib kelishmoqda.
O‘zbekiston Respublikasi Ichki ishlar Vazirining maslahatchisi general-polkovnik Zokirjon Almatovning Toshkent viloyati shahar va tumanlari faollari bilan muloqotlarda ushbu masalalarga alohida e'tibor qaratilmoqda.
Jumladan, viloyatning Angren, Olmaliq, Ohangaron shaharlari hamda Ohangaron tumanining mahalla faollari, yoshlar, hokimlik va ichki ishlar organlari vakillari bilan bo‘lib o‘tgan uchrashuvda hududlardagi jinoyatchilik va huquqbuzarliklarning oldini olish, fuqarolar osoyishtaligini ta'minlash va jamoat tartibini saqlash yo‘nalishida olib borilayotgan ishlar chuqur tahlil qilindi.
Muloqot davomida har bir mahallada jinoyatchilik va huquqbuzarliklarning sodir etilishiga yo‘l qo‘ymaslik, bu borada oila, mahalla, ta'lim muassasalari hamda huquqni muhofaza qiluvchi organlar hamkorligini yanada mustahkamlash yuzasidan fikr almashildi. Sodir etilgan huquqbuzarlik oqibatlari bilangina emas, balki uning barvaqt oldini olish hamda sodir etishga imkon bergan sabab va shart-sharoitlarni o‘z vaqtida bartaraf qilishga asosiy e'tibor qaratildi.
Shuningdek, muhokama davomida hududiy ichki ishlar organlari rahbarlarining hisoboti hamda mahalla faollarining va hayotiy tajribaga ega insonlarning tavsiyalari tinglandi.
