Qozog‘iston – O‘zbekiston chegarasidagi «Jibek Joli» posti orqali har kuni 25 mingga yaqin kishi o‘tmoqda

Qozog‘iston bosh vaziri Bakitjan Sagintayev 28 mart kuni Janubiy-Qozog‘iston oblastiga amalga oshirgan amaliy tashrifi davomida Sariog‘och tumanidagi “Jibek Joli” bojxona postiga bordi.

Xalqaro nazorat-o‘tkazish punkti O‘zbekiston bilan chegaradagi Jibek Joli qishlog‘ida joylashgan. Bu yerda har ikki yo‘nalishda chegarani kesib o‘tayotgan fuqarolar va transport vositalari chegara nazoratidan o‘tkaziladi. 

Qozog‘iston hukumati rahbari saytida xabar berilishicha, unga bojxona posti orqali bir sutkada 25 mingga yaqin jismoniy shaxslar va 100ga yaqin transport vositalari o‘tayotgani haqida hisobot berishgan. Shu bilan birga, “KazJolServis” rahbari Ye.Dikanbayevning so‘zlariga ko‘ra, yangi avtovokzal binosi qurilishi ikki davlat o‘rtasidagi yo‘lovchi oqimi va transport tashuvlari hajmini oshirishga imkon beradi.