Adliya vazirligi huzurida Jurnalistlar klubi tashkil etilishi rejalashtirilmoqda

2018 yil 2 aprel kuni Adliya vazirligida ommaviy axborot vositalari vakillari uchun “Axborot tarqatishda inson huquqlarini ta'minlash” mavzusida seminar-trening tashkil etildi. Unda mamlakatimizda faoliyat yuritayotgan ommaviy axborot vositalari, shu jumladan ilg‘or internet nashrlari (Kun.uz, Uz24.uz, “Norma”, “Darakchi” va h.k.) vakillari ishtirok etishdi. 

Seminar-treningda jurnalistlar tomonidan axborot tarqatish jarayonida yo‘l qo‘yilayotgan va inson huquqlari buzilishiga olib kelishi mumkin bo‘lgan kamchiliklar tahlil qilindi, materiallar tayyorlashda fuqarolarning sha'ni va qadr-qimmatini yoki ishchanlik obro‘sini tahqirlash yoki shaxsiy hayotiga aralashish holatlariga yo‘l qo‘yib bo‘lmasligi haqida fikr almashildi.  

Seminar-treningda so‘zga chiqqanlar, xususan O‘zbekiston Matbuot va axborot agentligi, Oliy sud vakillari bugungi kunda OAVlar faoliyatida noto‘g‘ri axborot tarqatish, sudning qarori qonuniy kuchga kirmay turib, uning natijalarini taxmin qilish va jamoatchilik fikriga ta'sir ko‘rsatish, aybi hali sudda isbotlanmagan shaxsni aybdorga chiqarib qo‘yish hamda inson huquqlarini boshqacha tarzda buzish holatlari uchrayotgani va bu huquqiy-demokratik jamiyatda yo‘l qo‘yib bo‘lmaydigan hodisa ekanligini ta'kidladilar. 

O‘z navbatida ommaviy axborot vositalari vakillari, xususan Kun.uz internet nashri, “Soliq va bojxona xabarlari”, “Adolat ko‘zgusi” kabi bosma nashrlar vakillari davlat organlaridan axborot olishda, sud majlislarini yoritishda qiyinchiliklarga duch kelayotganlari, huquqiy mavzulardagi materiallar tayyorlashda huquqshunos ekspertlar yordamiga ehtiyoj borligi haqida gapirdilar.  
  

Adliya vazirligi mas'ul xodimlari tomonidan jurnalistlarga ommaviy axborot vositalari faoliyatini tartibga soluvchi qonun hujjatlari normalarining mazmuni tushuntirildi va ularni to‘g‘ri qo‘llash yuzasidan tavsiyalar berildi. Shuningdek, axborotni tarqatishda fuqarolarning ismiga, o‘z tasviriga (foto/video) bo‘lgan huquqlarini va umuman inson huquqlarini buzishi mumkin bo‘lgan holatlar misollar bilan tushuntirib berildi, bu yo‘nalishdagi noqonuniy harakatlar uchun qonunlarda javobgarlik belgilangani ma'lum qilindi.  

Shuningdek, tadbir qatnashchilariga “Ommaviy axborot vositalari uchun axborot tarqatishda inson huquqlarini ta'minlash bo‘yicha qo‘llanma” tarqatildi.  Muhokamalar davomida OAV vakillari Adliya vazirligi va boshqa davlat organlari mas'ul xodimlaridan o‘zlarini qiziqtirgan savollarga javob oldilar.

Seminar-trening yakunlari bo‘yicha OAV vakillari jurnalistlar uchun shunday tadbirlar zarurligini ta'kidladilar, OAVlar faoliyatini nazorat qilishga vakolatli tashkilotlar, huquqni muhofaza qiluvchi organlar bilan jurnalistlar o‘rtasida muloqotni doimiy ravishda yo‘lga qo‘yish maqsadida Adliya vazirligi qoshida Jurnalistlar klubini tashkil etishga kelishib olindi.