Endi ovchilik guvohnomasi uchun kurs va testdan o‘tish talab etiladi

Adliya vazirligi Ovchilik guvohnomasini olish uchun talabgorlarni o‘quv kurslarida o‘qitish tartibi to‘g‘risidagi nizomni davlat ro‘yxatidan o‘tkazdi (ro‘yxat raqami 3887, 2026 yil 3 iyul).

Nizomga muvofiq, talabgorlar Ekologiya va iqlim o‘zgarishi milliy qo‘mitasi huzuridagi “Ekohudud va ovchilikni rivojlantirish departamenti” davlat muassasasi yoki u bilan shartnoma tuzgan ta’lim muassasalarida 10 soatlik o‘quv kurslarida tahsil oladi.

O‘quv mashg‘ulotlari bevosita auditoriyalarda yoki masofaviy ta’lim shaklida tashkil etiladi. Talabgorlar yil davomida elektron yoki yozma shaklda ariza topshirish imkoniyatiga ega bo‘ladi.

Kurslar 20–30 nafardan ortiq bo‘lmagan tinglovchilardan iborat akademik guruhlarda o‘tkaziladi. Mashg‘ulotlar ma’ruza va seminar shaklida tashkil qilinib, har bir darsning davomiyligi 80 daqiqani tashkil etadi.

Nizomga ko‘ra, o‘quv kurslari yakunida komissiya tomonidan test shaklida imtihon o‘tkaziladi. Tinglovchilar 100 ballik tizim asosida baholanadi va kamida 70 ball (70 foiz) to‘plaganlarga sertifikat beriladi.

Mazkur nizom 2026 yil 3 avgustdan kuchga kiradi.