Jizzaxda “Xizmat-beminnat” loyihasi doirasida uchta bepul kurs faoliyat yuritishni boshladi

O‘zMTDP Jizzax viloyat, Sharof Rashidov tuman Kengashi tashabbusi bilan tumanda “Xizmat-beminnat” loyihasi doirasida uchta bepul kurs faoliyati yo‘lga qo‘yildi. Bu haqda O‘zMTDP Jizzax viloyat Kengashi matbuot xizmati xabar bermoqda.

Yog‘och o‘ymakorligi, tikuvchilik va rassomchilik bo‘yicha ochilgan to‘garaklarga 11 nafar uyushmagan yoshlar qamrab olindi. Endilikda yog‘och o‘ymakorligi bo‘yicha Hilola Akramova, tikuvchilik bo‘yicha Surayyo Isayeva, rassomchilik bo‘yicha Muhayyo Bekboboyeva yoshlarga saboq beradi.  

- Ming afsuski bugungi kunda yoshlar o‘rtasida bezorilik va jinoyatchiliklar ko‘plab sodir etilmoqda. Bularning zamirida, eng avvalo, uyushmagan yoshlarning bandligi ta'minlanmaganligi yotibdi. Agar kishi biror foydali mehnat bilan mashg‘ul bo‘lsa, yanayam aniqroq aytadigan bo‘lsak, “g‘irt bekorchi” bo‘lmasa, uning ongida har xil bo‘lmag‘ur fikrlar va vayronkor g‘oyalar paydo bo‘lmaydi, - deydi O‘zMTDP Sh.Rashidov tuman Kengashi raisi Durdona Abdualiyeva. - Ma'lum bir ta'lim muassasasida tahsil olayotgan o‘g‘il-qizlar shundoq ham e'tibor va doimiy nazoratda bo‘ladi. Bizning asosiy maqsadimiz uyushmagan yoshlarni qamrab olib, ularni ta'lim va kasb-hunarga yo‘naltirishdan iborat. Shu orqali biz jamiyatda sog‘lom ma'naviy muhitni barqarorlashtirishimiz mumkin. “Bir bolaga yetti mahalla ota-ona” deganlaridek, bu yoshlarning barchasi bizning o‘g‘il-qizlarimiz, bizning bolalarimiz, kelajagi porloq vatanimizning egalari ular.