Ozarboyjon hukmron partiyasi prezident saylovlarida Ilhom Aliyev g‘alaba qozonganini e'lon qildi  

Ozarboyjonning hukmron partiyasi “Yeni Azerbayjan” raisi o‘rinbosari, bosh vazir o‘rinbosari Ali Axmedov mamlakatda 11 aprelda o‘tgan prezident saylovlari ekzit-poll natijalariga izoh berarkan, Ozarboyjon xalqi amaldagi prezident Ilhom Aliyevga ovoz berib, to‘g‘ri tanlov qilganini aytib o‘tdi.

Axmedovning ta'kidlashicha, Ozarboyjondagi prezident saylovlarini bo‘lib o‘tgan deb hisoblash mumkin.

“Ekzit-pol natijalariga ko‘ra Ilhom Aliyev 80 foizdan ko‘proq ovoz to‘plagan. Ozarboyjon xalqi Ilhom Aliyevga ovoz berib, to‘g‘ri tanlov qildi”, deb aytgan Axmedov.

Saylovlarda 8 nomzod qatnashgan, ulardan 6 nafari nomzodi siyosiy partiyalar, bir nafari tashabbuskor guruh tomonidan ilgari surilgan. Yana bir nomzod mustaqil nomzod sifatida ishtirok etgan. 

Saylovlar o‘tishini 894 nafar xalqaro va 58175 nafar mahalliy kuzatuvchi kuzatib borgan.

Ozarboyjonda 5314365 kishi ovoz berish huquqiga ega. Prezident saylovlarida ulardan 74,51 foizi, ya'ni 3959553 saylovchi ishtirok etgan.