“Asad biznikidan ko‘ra, ko‘proq sizning yigitdir” – Mariya Zaxarova Bashar Asad haqida

Rossiya tashqi ishlar vazirligining rasmiy vakili Mariya Zaxarova Suriyadagi kimyoviy qurolsizlantirish boshlanguncha prezident Bashar Asad “Moskvaning emas, London va Vashingtonning eng yaxshi do‘sti” bo‘lganini eslatib o‘tdi.

“Suriyadagi kimyoviy qurolsizlantirish boshlanguncha Asad Moskvaning emas, London va Vashingtonning eng yaxshi do‘sti bo‘lgan. Kerri (AQShning sobiq davlat kotibi Jon Kerri) senatda ishlaganda, Asad bilan do‘stona munosabatlarda bo‘lgan”, deb aytgan Zaxarova Britaniyaning Sky News telekanaliga bergan intervyusida.

“Asad hayotining katta qismini Britaniyada o‘tkazgan. U biznikidan ko‘ra, ko‘proq sizning yigitdir”, deb qo‘shimcha qilgan Zaxarova.

G‘arb davlatlari o‘tgan hafta oxiridan rasmiy Damashqni Duma shahriga kimyoviy hujum sodir etishda ayblab kelmoqda. 

Damashq 2013 yildagi kelishuv doirasida 1,3 ming tonna kimyoviy modda va kimyoviy qurolni yaratishda qo‘llanadigan prekursorlarni hamda 1,2 ming zaryadlanmagan o‘q dorilarini yo‘q qilganini deklaratsiya qilgan. Kimyoviy qurolni taqiqlash tashkiloti 2016 yil yanvarda Suriyada kimyoviy qurolning to‘liq yo‘q qilinganini e'lon qilgandi.