Vashington shtatida 3 mingdan ortiq oʻzbeklar yashab kelmoqda. Shtat IT, muhandislik, tibbiyot, aviatsiya va ishlab chiqarish boʻyicha ijobiy koʻrsatkichlarga erishgani bois bu yerdagi vatandoshlarimiz ham asosan turli kompaniyalarda faoliyat yuritadi.
Maqsuda Yukcyel asli Buxorodan boʻlib, 26 yil avval AQShga koʻchib oʻtgan. Bugun u Amerika ijtimoiy himoya tizimida faoliyat yuritadi, shtatdagi harbiylar va faxriylarga yordam tizimini belgilashda qatnashuvchi xodimlaridan biri. U har ikki yilda Buxoroga borib-kelishga harakat qilishini aytadi. Insonlararo issiqlikni, mehribonlikni eng koʻp sogʻinaman, deydi u.
“26 yil avval kelgan boʻlsam-da, Vatanimni sogʻinaman. Hamma narsasini sogʻinaman, borganimda qarindoshlarim uchun bayram boʻladi”, deydi Maqsuda Yuksel.
Sanobar esa oʻqituvchi, 14 yildan beri AQShda yashab keladi. U bugun nafat oilasi, balki onasi bilan ham birga Amerikada. Oʻqituvchi sifatida u boshlangʻich sinf oʻquvchilariga dars beradi, Amerikaga esa Green card dasturi orqali kelgan.
“Bu yerda taʼlim tizimi butunlay boshqacha, har bir sinfda kamida 15 ta millat vakillari oʻtirgan boʻladi. Shuningdek, bolalarni teng koʻrasiz, bilimli-bilimsizga ajratolmaysiz, ular bilan bir-birimizni tushunib ishlashga majburmiz”, deydi asli buxorolik Sanobar.
Feruza Hoshimova esa asli toshkentlik, oʻn yillardan beri oilasi bilan AQShda yashaydi. U maktabgacha taʼlim tizimida ishlab keladi. Ikki nafar farzandi AQShdagi oliygohlarda oʻqiydi. Hatto, bogʻchadan ham biz bolalarning koʻngliga qarashga majburmiz, deydi u.
Tadbirda Oʻzbekistonning Vashington shtatidagi bosh konsuli Ahror Burhonov soʻzga chiqdi, yigʻilganlarni mustaqillik bayrami bilan tabrikladi.
