Tojikistonda Millat yetakchisi jamg‘armasi yaratiladi 

Tojikiston parlamenti quyi palatasi “Davlat moliyasi to‘g‘risida”gi qonunga tuzatmalar kiritdi. Unga ko‘ra, Millat yetakchisi jamg‘armasi yaratilmoqchi.  

Tojikiston moliya vaziri Rustam Shoxmurod deputatlar oldidagi chiqishida tuzatmalar Millat yetakchisi jamg‘armasini yaratishni ko‘zda tutishini ta'kidlab o‘tgan. Bu jamg‘arma davlat byudjyeti mablag‘lari hisobiga to‘ldirib boriladi. 

Shoxmurodning aytishicha, jamg‘armaga umumiy davlat byudjyetidan 0,2 foizi (joriy yilda bu qiymat 42 mln somoniy yoki 4,6 mln dollar) o‘tkaziladi. 

Jamg‘arma mablag‘larini ishlatish tartibini Millat yetakchisi, ya'ni Tojikistonning amaldagi prezidenti Imomali Rahmon belgilaydi. Mablag‘lar xayriya maqsadlariga yo‘naltiriladi.  

Vazirning ta'kidlashicha, jamg‘armaga mablag‘lar o‘tkazilishi amaldagi prezident o‘z vakolatlarini topshirgandan keyin boshlanadi.

Tojikiston konstitutsiyasiga ko‘ra, bir kishi qatorasiga ikki muddatdan ko‘proq prezident bo‘la olmaydi.

Biroq Tojikiston konstitutsiyasiga 2016 yil maydagi tuzatishlarga ko‘ra, “cheklovlar Tinchlik va millat birdamligi asoschisi – Millat yetakchisiga taalluqli emas. Millat yetakchisi huquqiy maqomi va vakolatlari konstitutsiyaviy qonun bilan belgilanadi”.    

Bu esa amaldagi prezident Imomali Rahmonning Millat yetakchisi sifatida prezident lavozimiga cheklanmagan marta saylana olishini anglatadi.