Belgiya kompaniyasi Toshkentda piyodalar uchun 23ta yerusti ko‘prigi quradi

Belgiyaning Victor Buyck Steel Construction (VBSC) kompaniyasi Toshkentda 23ta piyodalar yerusti ko‘prigi quradi, deya xabar beradi «Jahon» AA.

Loyiha O‘zbekiston delegatsiyasining 9 may kuni Bryusselga tashrifi doirasida taqdim etildi.

«Bir necha oy avval biz Toshkentga tashrif buyurdik. Tashrif chog‘ida hamkorlikning istiqbolli yo‘nalishlari muhokama qilindi. O‘zbek hamkasblarimiz piyodalar yerusti ko‘priklarini qurish bo‘yicha loyihani ko‘rib chiqishni taklif etishdi. Biz ushbu masalada muzokaralar o‘tkazdik va endi rejalarimizni amalga oshirishga harakat qilyapmiz», - dedi VBSC ijrochi direktori Pit Ferxayyen.

Kompaniya joriy yilning may oyi oxirigacha ko‘priklarning yakuniy loyihasi tayyor bo‘lishini va'da qilmoqda. Toshkent shahar hokimiyati KUN.UZ’ning mazkur masala bo‘yicha savolini javobsiz qoldirdi.

Avvalroq, Toshkent shahar Yo‘l harakati xavfsizligi boshqarmasi shaharning 22ta chorrahasida piyodalar yerusti ko‘prigi qurish rejalari haqida ma'lum qilgandi.