Venesuelada prezident qayta saylandi - mamlakatning iqtisodiy ahvoli qanday?

Bolivar inqilobi davom etadi — kuzatuvchilar Venesuelada bo‘lib o‘tgan prezidentlik saylovlarida 6 millionga yaqin aholi komandantening vorisi — Nikolas Maduroni yoqlab o‘z ovozlarini berganini deyarli shunday baholashmoqda. Sobiq avtobus haydovchisi va kasaba uyushmasi yetakchisiga 68 foiz xalq ovoz bergan, garchi muxolifat davomat juda kam — 46 foiz atrofida bo‘lganini ta'kidlayotgan esa-da, rasmiy ma'lumotlarga ko‘ra saylovda saylovchilarning 80 foizdan yuqorisi ishtirok etgan.

Muxolifat yetakchisi Enri Falkon saylov natijalarini tan olishdan bosh tortgan.

2017 yil mobaynida Venesuelada 10 mingga yaqin norozilik aksiyalari bo‘lib o‘tgan. Yil davomida norozilik namoyishlarida 163 kishi halok bo‘lgan.

2015 yildan 2017 yilgacha jahon bo‘ylab Venesueladan migrantlar soni ikki barobarga oshgan. 2015 yilda ularning soni 700 ming kishi bo‘lgan bo‘lsa, 2017 yilda xorijga ish izlab chiqqanlar soni 1,6 millionga yetgan. Venesuela aholisi 31 million kishi.

2018 yilning aprelida Venesuela bezgakka chalinish bo‘yicha jahonda birinchi o‘ringa chiqib oldi. 2013 yildan buyon mamlakatda bolalar va onalar o‘limi ortib bormoqda. 2013 yilda mamlakatda 1 yoshgacha bo‘lgan chaqaloqlardan 7,3 mingi nobud bo‘lgan bo‘lsa, 2016 yilga kelib bu raqam 11,4 mingtaga yetdi.

Keyingi uch-to‘rt yilda haftalik go‘sht va parranda iste'moli aksariyat venesuelaliklar uchun hashamat darajasiga ko‘tarilgan. 2014 yilda oilalarning qariyb 80 foizi haftada bir marta parranda go‘shti, 74,8 foizi go‘sht xarid qilgan bo‘lsa, 2017 yilda bu ko‘rsatkichlar mos ravishda 34 va 39,9 foizga tushib ketdi. Sut mahsulotlari yanada kamyobga aylangan: 2014 yilda uni 47,2 foiz oila xarid qila olgan, 2017 yilda esa — 19,2 foiz. Qahvani 2014 yilda 32,4 foiz oila sotib ololgan, 2017 yilda — 13,7 foiz.

Mamlakat milliy valyutasi — bolivar ham shiddat bilan qadrsizlanishda davom etmoqda. Bugun 1 AQSh dollari 72 577,6 bolivarga teng bo‘lib turibdi. Holbuki 3 yilgina muqaddam 1 dollar 8 bolivarga teng bo‘lgan. 

Xalqidan uzoqlashgan Maduro saylovdagi g‘alabani bo‘m-bo‘sh maydonda nishonlayotgani xususidagi video tarqaldi. Uni olqishlayotgan xalq keyinchalik montaj qilinishi uchun maydonga xromakeylar o‘rnatilgan.