AQSH prezidenti Donald Tramp 29-avgust kuni Truth Social ijtimoiy tarmogʻida Vashington va Venesuela oʻrtasida yirik neft bitimi tuzilganini eʼlon qildi.
Trampning taʼkidlashicha, kelishuv natijasida AQSH Janubiy Amerika mamlakatining neft zaxiralarining beshdan bir qismi ustidan nazoratga ega boʻladi.
«Ushbu tarixiy bitim Amerikaning neft zaxiralarini ikki baravardan ham koʻproq oshiradi, neft taʼminotimizni sezilarli darajada kengaytiradi va barcha amerikaliklar uchun benzin narxini uzoq yillarga jiddiy pasaytiradi», - deya yozgan Tramp.
AQSH prezidenti kelishuvning batafsil shartlarini ochiqlamagan.
Gap 65 mlrd barreldan ortiq neft haqida ketmoqda
Trampning maʼlum qilishicha, AQSH Venesueladagi 65 mlrd barreldan ortiq tasdiqlangan neft zaxiralari ustidan nazorat oladi. Uning soʻzlariga koʻra, bu xususiy kompaniyalar bilan hamkorlik orqali amalga oshiriladi va amerikalik soliq toʻlovchilar uchun hech qanday xarajat talab qilmaydi.
Tramp bitimni imzolash jarayonida AQSH davlat kotibi Marko Rubio, mudofaa vaziri Pit Hegset va Venesuelaning muvaqqat prezidenti Delsi Rodriges ishtirok etganini bildirdi.
Soʻnggi bir necha hafta davomida Vashington va Karakas Amerika kompaniyalariga Venesueladagi qator neft konlaridan uzoq muddat foydalanish imkoniyatini berish masalasida muzokaralar olib borgan. Bundan koʻzlangan maqsad qazib olinadigan xom neftning AQShga barqaror yetkazib berilishini taʼminlash boʻlgan.
Venesuela dunyodagi eng yirik tasdiqlangan neft zaxiralariga ega mamlakat hisoblanadi. Biroq koʻp yillik investitsiya tanqisligi, samarasiz boshqaruv va sanksiyalar sabab mamlakatning neft qazib olish hajmi mavjud zaxiralariga nisbatan ancha past darajada qolmoqda.
Maʼlumotlarga koʻra, hozir Venesuelada kuniga taxminan 1,25 mln barrel neft qazib olinadi.
Hozircha Venesuela tomoni Tramp eʼlon qilgan kelishuv shartlari va AQShning 65 mlrd barreldan ortiq neft zaxiralari ustidan nazorati qanday mexanizm asosida amalga oshirilishi haqida batafsil maʼlumot bermagan.
