Jarqo‘rg‘onlik 81 yoshli faxriy o‘qituvchi Xudoyberdi Mamadaliyev o‘qituvchilarga o‘z hayotiy tajribasi asosida kimyo fanidan dars va laboratoriya mashg‘ulotlarini qanday o‘tish kerakligi bo‘yicha “Mahorat darsi” o‘tmoqda. Bu haqda Xalq ta'limi vazirligi matbuot xizmati xabar bermoqda.
Xalq ta'limi vazirligi tashabbusi bilan joriy yildan boshlab har bir tuman va shaharda to‘rtta yo‘nalishda - “Aniq fanlar”, “Tabiiy fanlar”, “Gumanitar fanlar” va “Filologiya fanlari” bo‘yicha tayanch maktablari belgilanib, ularda oliy ta'lim muassasalari hamda pedagog kadrlarni qayta tayyorlash va malakasini oshirish markazlari bilan hamkorlikda pedagoglar uchun uzluksiz metodik xizmat yo‘lga qo‘yilgan.
Surxondaryo viloyatining Jarqo‘rg‘on tumanidagi 12-sonli davlat ixtisoslashtirilgan umumta'lim maktab-internati kimyo fanida tuman miqyosida tayanch maktab sifatida belgilangan bo‘lib, muassasada tumandagi kimyo fan o‘qituvchilari uchun uzluksiz metodik xizmat tashkil etilgan.
81 yoshli mehnat faxriysi Xudoyberdi bobo Mamadaliyev, tumandagi 37-sonli maktabda uzoq yillar samarali faoliyat ko‘rsatgan. Jamiyatdagi o‘zgarishlar, xususan, ta'lim tizimida olib borilayotgan islohotlarga befarq bo‘lmasdan, unda faol ishtirok etib kelmoqda.
Xudoyberdi bobo Mamadaliyev 12-sonli davlat ixtisoslashtirilgan umumta'lim maktab-internatida “Ustoz-shogird” an'analarini davom ettirgan holda, kimyo fani o‘qituvchilariga darsni qiziqarli o‘tish, amaliy mashg‘ulotlarni olib borish, o‘quvchilar bilan ishlash bo‘yicha o‘zining ko‘p yillik tajribalari asosida “Mahorat dars”larini o‘tib kelmoqda.
Jarqo‘rg‘on tuman xalq ta'limi bo‘limi hozirda 80 yoshdan oshgan 5 nafar faol faxriy pedagog bilan “Ustoz-shogird” an'nalarini davom ettirishda hamkorlik qilmoqda.
