DXX xabariga koʻra, tadbir Davlat xavfsizlik xizmati va ichki ishlar organlari xodimlari hamkorligida oʻtkazilgan.
Toshkent viloyatidan harakatlanib kelgan avtomobilni Denov tumanida yashovchi, 1977-yilda tugʻilgan shaxs boshqargan. Mashina tuman hududida toʻxtatilib, tekshirilganda yukxonadagi gazballoni ichiga 43 ta oʻramda opiy yashirilgani maʼlum boʻlgan.
Tezkor tadbir davomida ushbu giyohvandlik vositasini olib ketish uchun kelgan, 1960 va 1983-yillarda tugʻilgan ikki fuqaro qoʻlga olingan. Ular Denov va Sariosiyo tumanlarida yashaydi. Rasmiy xabarda ikkalasi ham avval giyohvandlik vositalari savdosi bilan bogʻliq jinoyat uchun sudlangani qayd etilgan.
Keyingi bosqichda Sariosiyo tumanida yashovchi, 1978-yilda tugʻilgan shaxs ham ushlangan. DXX uni qoʻshni davlatdan olib kelingan giyohvandlik vositasining buyurtmachisi sifatida koʻrsatgan. U ham muqaddam giyohvandlik vositalari savdosi bilan bogʻliq jinoyat uchun sudlangan.
Hozirda mazkur shaxslarga nisbatan jinoyat ishi qoʻzgʻatilgan, tergov harakatlari davom etmoqda.
