Milliy gvardiya idoraviy akademik litseylari faoliyati takomillashtiriladi

“O‘zbekiston Respublikasi Milliy gvardiya idoraviy akademik litseylarining faoliyatini takomillashtirish chora tadbirlari” qaror loyihasi normativ-huquqiy hujjatlarning muhokamasi portalida e'lon qilindi.

O‘zbekiston Respublikasi Milliy gvardiyasi idoraviy akademik litseylari to‘g‘risidagi nizomga ko‘ra, O‘zbekiston Respublikasi Milliy gvardiyasi idoraviy akademik litseylarga umumiy rahbarlik qiladi, ularning faoliyatini to‘liq moliyalashtiradi va moddiy-texnik jihatdan ta'minlaydi.

Quyidagilar idoraviy akademik litseylarining vazifalari hisoblanadi:

o‘quvchilarni o‘rta maxsus ta'limi Davlat ta'lim standarti talablariga muvofiq sifatli o‘qitishni tashkil etish;
ta'limning uzluksizligini va izchilligini, umumta'lim muassasalari o‘quv dasturlarining o‘rta maxsus ta'limi muassasalari o‘quv dasturlari bilan uzviy bog‘liqligini, o‘quvchilar tomonidan muntazam bilimlar olinishini ta'minlash, ularda bilim olish ehtiyojini rivojlantirish, bazaviy o‘quv, ilmiy va umummadaniy bilimlarni shakllantirish;
yoshlarni Vatanga sadoqat, yuksak fuqarolik hamda demokratiya, mustaqillik g‘oyalariga, o‘z xalqining ma'naviy va tarixiy qadriyatlariga sadoqat ruhida tarbiyalash;
vatanparvarlik va ma'naviy-axloqiy fazilatlarga ega bo‘lgan, keng rivojlangan, yuqori malakali yoshlarni tarbiyalash, o‘quvchilarda milliy hamda tarixiy qadriyatlarni uyg‘unlashtirish asosida o‘z Vataniga va xalqiga sodiq fuqaroni shakllantirish;
o‘quvchilarga qonunchilikni to‘g‘ri tushunishni va ularga ongli rioya qilishni ta'minlaydigan yuksak madaniyatni, ko‘nikmalarni, faol ijtimoiy-fuqarolik xulq-atvorni, Vatan kelajagi uchun o‘ziga mas'uliyatni olish hamda davlat mustaqilligini himoya qilishini tayyor bo‘lishga ta'minlash nuqtai nazardan mustahkam qarashlar va qat'iy fuqarolik pozitsiyani singdirish;
idoraviy akademik litseyi ta'lim yo‘nalishiga muvofiq, o‘quvchilarni tegishli mutaxassisliklar bo‘yicha Milliy gvardiya Harbiy-texnik instituti, oliy harbiy va oliy ta'lim muassasalarida o‘qishni davom ettirishlari uchun chuqurlashtirilgan kasbiy tayyorgarligini ta'minlash;
xizmat va harbiy burchini ado etishda zarur bo‘lgan professional harbiy va ijodiy ko‘nikmalarni shakllantirish;
respublika va xorijiy mamlakatlar ta'lim muassasalarining ilg‘or tajribasini inobatga olgan holda o‘quv-tarbiya jarayonini tashkil etish;
o‘quv-tarbiya jarayonida ilg‘or pedagogik va zamonaviy axborot kommunikatsiya texnologiyalar qo‘llanilishini ta'minlash;
o‘quvchilarda jismoniy chidamlilik, kuch, chaqqonlik va tezkorlikni rivojlantirish.

Idoraviy akademik litseylarining ta'lim yo‘nalishlari O‘zbekiston Respublikasi Milliy gvardiyasi tomonidan mustaqil belgilanadi.

Idoraviy akademik litseylarida o‘quvchilar bilimini baholash O‘zbekiston Respublikasi Oliy va o‘rta maxsus ta'lim vazirligi va Xalq ta'limi vazirligi tomonidan belgilangan mezonlar asosida amalga oshiriladi. 

O‘qish tamom bo‘lgandan keyin har bir kursda reyting nazorati va attestatsiya natijalari bo‘yicha idoraviy akademik litsey o‘quvchilarini navbatdagi kursga o‘tkazish to‘g‘risida qaror qabul qilinadi. O‘quvchilarning kursdan kursga o‘tishi idoraviy akademik litsey direktorining buyrug‘i bilan amalga oshiriladi.

Idoraviy akademik litseyiga o‘qishga qabul qilinadigan shaxslar o‘quvchilar deb ataladi, ularga belgilangan namunadagi o‘quvchi bileti va o‘zlashtirish daftarchasi beriladi.

Idoraviy akademik litseyda o‘qish muddati ikki yildan iborat bo‘ladi.

Idoraviy akademik litseyini tamomlagandan keyin bitiruvchilarga davlat namunasidagi diplom va egallagan mutaxassisligi bo‘yicha sertifikat beriladi.

Idoraviy akademik litseylariga o‘qituvchilar tanlov asosida ishga qabul qilinadi.

Idoraviy akademik litseyiga O‘zbekiston Respublikasi Milliy gvardiyasi qo‘mondoni tomonidan lavozimga tayinlanadigan va lavozimdan ozod etiladigan direktor rahbarlik qiladi. Idoraviy akademik litseylari direktorlarining o‘rinbosarlari O‘zbekiston Respublikasi Milliy gvardiyasi qo‘mondonligi bilan kelishilgan holda idoraviy akademik litseyi direktori tomonidan lavozimga tayinlanadi va lavozimdan ozod qilinadi.

Direktor:

idoraviy akademik litseyi faoliyatiga rahbarlik qiladi;
o‘quvchilarning sifatli o‘qitilishi va tarbiyalanishi, o‘quv rejalari
va dasturlarining bajarilishi, idoraviy akademik litseyining o‘quv-metodik va moliyaviy-xo‘jalik faoliyati uchun javob beradi;
xodimlar va o‘qituvchilarni ishga qabul qiladi va ishdan bo‘shatadi;
belgilangan shtatlar jadvaliga asosan xodimlar soni va mehnatga haq to‘lash fondi doirasida pedagog xodimlarning tarifikatsiya bo‘yicha ro‘yxatlarini O‘zbekiston Respublikasi Milliy gvardiyasi Moliya-iqtisod boshqarmasiga taqdim qiladi.