Rossiya sudi Telegram shifrlash kalitlarini taqdim etish imkoniga ega emasligiga ishonmadi

Moskva shahrining Taganka sudi Telegram vakillari FXXga shifrlash kalitlarini taqdim etish imkonsiz ekaniga oid dalillarni taqdim etmadi, degan xulosaga keldi. Bu haqda RIA «Novosti» xabar qilmoqda.

Sud qaroriga ko‘ra, Telegram qonun doirasida harakat qilishi va federal ijro organiga messenjer xabarlarini koddan chiqarish imkonini beradigan ma'lumotlarni taqdim etishi lozim.

«Telegram Messenger Limited Liability Partnership manfaatdor shaxsning «Axborot, axborot texnologiyalari va axborotni himoya qilish to‘g‘risida»gi Federal qonunning 10.1-moddasi 4.1-qismida nazarda tutilgan majburiyatlarni texnik sababga ko‘ra bajara olmaslik bo‘yicha tushuntirishi talablarni qanoatlantirishdan bosh tortish uchun asos bo‘la olmaydi», - deyiladi qarorda.

Bundan tashqari, sudya ish materialida Telegram qonunchilik bilan nazarda tutilgan talabni bajarish imkoniga ega emasligiga doir ma'lumotlarni aniqlamagan.

Eslatib o‘tamiz, avvalroq Telegram Apple tomonidan bloklash amalga oshirilayotganini ma'lum qilgandi.