Dunyodagi eng uzun aviareys 11 oktabrda yana yo‘lga qo‘yilmoqchi. Bu haqda Airlines Ratings ma'lum qildi.
Singapurdan Nyu-Yorkning “Nyuark Liberti” xalqaro aeroportiga parvozni Singapore Airlines aviakompaniyasi yangi Airbus A350-900ULR samolyotida amalga oshiradi. Samolyot osmonda 18 soat 45 daqiqa bo‘lib, qo‘nishlarsiz 16,7 ming km masofani uchib o‘tadi.
Dastlab parvozlar haftasiga 3 marta: dushanba, payshanba va shanba kunlari amalga oshiriladi. Keyinroq aviakompaniya yo‘nalishga yana bitta samolyotni qo‘yadi va parvozlar har kuni amalga oshiriladi.
Airbus A350-900ULR samolyoti biznes-sinfdagi 67 ta va premial ekonom sinfdagi 94 ta o‘rinni o‘z ichiga oladi. Reysga chiptalarni 31 may kunidan boshlab xarid qilish mumkin bo‘ladi.
“Singapur havo yo‘llari” Singapur-Nyu-York yo‘nalishi bo‘yicha avvalroq ham parvoz amalga oshirgan, biroq ular 2013 yilda A340-500s samolyoti chiqarilmay qo‘yilgani sababli to‘xtatib qo‘yilgandi. Samolyot 15344 km yo‘lni 18 soatdan biroz ko‘proq vaqtda uchib o‘tgan.
2017 yilda Qantas aviakompaniyasi Avstraliyaning Pert shahridan Londonga ilk qo‘nishlarsiz parvozni amalga oshirdi: Boeing 787-9 Dreamliner 14,5 ming km masofani 17 soatda uchib o‘tgan.
