DW xabariga koʻra, Mamdani mazkur strategiyani 29-sentabr kuni taqdim etgan. Shahar maʼmuriyati sinagogalarni qoʻriqlashga qoʻshimcha mablagʻ ajratish hamda yahudiy diniy inshootlari xavfsizligi boʻyicha ishchi guruh faoliyatini tiklashni rejalashtirmoqda.
Strategiya doirasida shahar boʻylab antisemitizmga qarshi axborot kampaniyalari oʻtkaziladi, Xolokost haqida maʼlumot beruvchi taʼlim dasturlari kengaytiriladi.
Yahudiy madaniy markazlari va notijorat tashkilotlarini qoʻllab-quvvatlashga ham millionlab dollar yoʻnaltirish koʻzda tutilgan. Ular orasida Kvins hududida barpo etilayotgan Xolokost qurbonlari yodgorligi hamda Bruklindagi Yangi yahudiy madaniyati markazi bor.
Mamdani X ijtimoiy tarmogʻida eʼlon qilgan videomurojaatida yahudiylar Nyu York aholisining 12 foizini tashkil etishiga qaramay, politsiya qayd etgan nafrat jinoyatlarining yarmidan koʻpi antisemitizm bilan bogʻliq ekanini aytgan.
«Bu nafaqat qabul qilib boʻlmaydigan holat, balki biz oʻzgartirishimiz shart boʻlgan vaziyatdir. Shahar maʼmuriyati bu borada yetakchi rolni oʻz zimmasiga oladi», - degan mer.
Mamdanining Isroil–Falastin mojarosiga munosabati
Nyu York tarixidagi birinchi musulmon mer Zohron Mamdani Falastinni qoʻllab-quvvatlashi va Isroil siyosatini tanqid qilishi bilan tanilgan. Uning bu qarashlari shahardagi yahudiy jamoasining bir qismi noroziligiga sabab boʻlgan. Ayni paytda, Nyu York yahudiylari orasida Mamdanining tarafdorlari ham bor.
Isroil bosh vaziri Binyamin Netanyahu Nyu Yorkdagi BMT Bosh Assambleyasida soʻzlagan nutqida Mamdanini antisemit deb atagan.
DW maʼlumotiga koʻra, Mamdani 2026-yilgi saylov kampaniyasi davomida Netanyahu Nyu Yorkka kelsa, Xalqaro jinoyat sudi 2024-yilda bergan hibsga olish orderi asosida uning hibsga olinishiga erishishga harakat qilishini aytgan. Biroq mer lavozimiga kirishganidan soʻng, bunday vakolatga ega emasligini tan olgan.
