MDH mudofaa vazirlari uchuvchisiz aviatsiyani qo‘llashdagi hamkorlikni muhokama qiladi

2018 yil 6 iyun kuni Rossiya Federatsiyasining Kizil shahrida MDHga a'zo davlatlarning mudofaa vazirlari kengashi navbatdagi yig‘ilishi bo‘lib o‘tadi. Bu haqda tashkilotning Ijroiya qo‘mitasi matbuot xizmati xabar berdi.

Yig‘ilish kun tartibidagi loyihada 24ta masala bor. Xususan, Kengash a'zolari Hamdo‘stlik mamlakatlarining 2020 yilgacha harbiy hamkorligi ustuvor yo‘nalishlarini, «ArMI-2018» Armiya xalqaro o‘yinlarini o‘tkazish va «Mintaqaviy xavfsizlik-2018» RQM birlashgan tizimi qo‘shma kompyuterlashgan qo‘mondonlik-shtab mashg‘ulotlari, jismoniy tayyorgarlik va sport sohasidagi hamkorlikni rivojlantirishni muhokama qiladi.

Yig‘ilishda, shuningdek, «Toza osmon-2018» havo hujumidan mudofaa qo‘shinlari qo‘mondonlik-shtab tezkor-taktik mashqlarining o‘tkazilishi, uchuvchisiz aviatsiyadan foydalanish sohasidagi o‘zaro hamkorlik, gidrometeorologiya sohasida va Yagona davlat radiolokatsiya identifikatsiya tizimi sohasida hamkorlikni rivojlantirish masalalari muhokama qilinadi.

Mudofaa vazirliklari rahbarlari MDH mamlakatlari qurolli kuchlarining qo‘shma (birgalikdagi) aloqa tizimi to‘g‘risidagi, harbiy maqsadlarda foydalanish uchun sun'iy yo‘ldosh aloqa tizimlaridan foydalanish va ularni yanada takomillashtirish, geomakon ma'lumotlarni almashish sohasida hamkorlik to‘g‘risidagi kelishuv loyihalarini ko‘rib chiqadilar.

Bundan tashqari, uchrashuvda MDH davlatlari Oliy harbiy-ta'lim muassasalari assotsiatsiyasi, 2017 yil uchun qurolli kuchlar aviatsiyasi parvozlari xavfsizligi holati, qator tashkiliy va moliyaviy masalalar ko‘rib chiqiladi.

Mustaqil Davlatlar Hamdo‘stligiga a'zo davlatlarning mudofaa vazirlari Kengashi 1992 yilda tashkil etilgan. Uning tarkibiga Ozarboyjon, Armaniston, Belarus, Qozog‘iston, Qirg‘iziston, Rossiya, Tojikiston, O‘zbekiston vakillari kiradi.