O‘zbekiston va Qozog‘iston Toshkent-Chimkent transport yo‘lagini rivojlantiradi

O‘zbekiston va Qozog‘iston «Toshkent-Chimkent» savdo yo‘lagi uchun transport-logistika qo‘shma korxonasini tashkil etadi. Bu haqda «Qozog‘iston taraqqiyot banki» matbuot xizmati xabar bergan.

«Chimkent-Toshkent savdo-iqtisodiy yo‘lagini rivojlantirish maqsadida Qozog‘iston-O‘zbekiston transport-logistika qo‘shma korxonasini (bundan keyin QK) tashkil etish rejalashtirilgan. Ushbu qo‘shma korxona doirasida, xususan, yuk tashish uchun «yashil yo‘lak» tashkil etilishi kutilmoqda. Bunda yiliga 250-400 ming tonna tashuv hajmi bilan har ikki mamlakatning logistika markazlarida xizmat ko‘rsatiladi», - deyiladi xabarda.

«Qozog‘iston taraqqiyot banki» aksiyadorlik kompaniyasi moliyalashtirishi bilan 2017 yil oxirida foydalanishga topshirilgan Chimkentdagi «A» sinfida bo‘lgan transport-logistika markazda joriy yil oxirigacha yarim million tonnagacha yukni qayta ishlash rejalashtirmoqda, bunda omborxona 80 foizga to‘ldiriladi.

«TLM Janubiy Qozog‘iston oblastiga O‘zbekiston, Qirg‘iziston, Tojikistondan Rossiyaga va aksincha yo‘nalishdagi tranzit bilan kiruvchi tovarlarni bojxona rasmiylashtiruvi va saqlash nuqtasi vazifasini o‘taydi. Bugungi kunda TLMda 1500dan ortiq palletlar va o‘simlik mahsulotlari, shakar, parranda go‘shti va konserva mahsulotlari, jumladan, Qozog‘iston Barqarorlashtirish jamg‘armasining zaxiralari saqlanmoqda», - deyiladi xabarda.