“O‘zbekiston Respublikasi Savdo-sanoat palatasi to‘g‘risida”gi qonun ma'qullandi

28 iyun kuni ish boshlagan Senatning o‘n beshinchi yalpi majlisida senatorlar ishni yangi tahrirdagi “O‘zbekiston Respublikasi Savdo-sanoat palatasi to‘g‘risida”gi O‘zbekiston Respublikasi Qonunini ko‘rib chiqish bilan davom ettirishdi. Bu haqda Kun.uz muxbiri xabar bermoqda.

Ma'lum qilinishicha, qonunning maqsadi – integratsiyalashgan tadbirkorlik hamjamiyatini shakllantirish va tadbirkorlik sub'yektlarining, ular birlashmalarining davlat organlari bilan samarali hamkorligini ta'minlash, shuningdek tadbirkorlik sub'yektlarini keng qamrab olish va ularni tadbirkorlik hamjamiyatini shakllantirish jarayoniga jalb qilishdir.

Qonunda umumiy qoidalar, Palataning vazifalari va funksiyalari, Palataning davlat organlari, boshqa organlar va tashkilotlar bilan hamkorligi, tadbirkorlik sub'yektlari faoliyatini tekshirishlarda Palataning ishtiroki, Palata faoliyatini tashkil etish, Palataning xalqaro hamkorligi, nizolarni hal qilish mexanizmi nazarda tutilgan.

Qonuning yangi tahririda tadbirkorlik sub'yektlari huquqlarini himoya qilish hamda ishbilarmonlik va investitsiya muhitini yaxshilash, tadbirkorlik faoliyatiga ko‘maklashish, davlat organlari, boshqa organlar va tashkilotlar bilan o‘zaro hamkorlik qilish, tadbirkorlik sub'yektlarini o‘qitish va kadrlar tayyorlash, tashqi iqtisodiy faoliyat va chet el investitsiyalarini jalb qilish sohalaridagi Palataning funksiyalari mustahkamlab qo‘yilgan.

Senatorlar tomonidan ta'kidlanganidek, qonunning qabul qilinishi tadbirkorlik sub'yektlarini, ayniqsa ularning faoliyati qaror topayotgan davrda qo‘llab-quvvatlashning samarali tizimini yaratishga, ularning huquqlari va qonuniy manfaatlarini ishonchli himoya qilish kafolatlarini kuchaytirishga, jadal rivojlantirishga har tomonlama ko‘mak berishga, ularning ustuvor rolini va daxlsizligini ta'minlashga, respublika tumanlari va shaharlari aholisining tadbirkorlik faoliyatiga keng jalb qilinishiga ko‘maklashadi. 

Ma'lumot uchun, qonun O‘zbekiston Respublikasi Prezidentining “Biznesning qonuniy manfaatlari davlat tomonidan muhofaza qilinishi va tadbirkorlik faoliyatini yanada rivojlantirish tizimini tubdan takomillashtirishga doir chora-tadbirlar to‘g‘risida”gi farmonini ijro etish maqsadida ishlab chiqilgan.