Senatning 20-yalpi majlisida qurilish sohasida korrupsiya va manfaatlar toʻqnashuvining oldini olish yuzasidan yuborilgan parlament soʻrovi natijalari koʻrib chiqildi.
Parlament soʻrovi doirasida Qurilish va uy-joy kommunal xoʻjaligi vazirligi tizimida korrupsiyaviy xavflarni baholash, manfaatlar toʻqnashuvini boshqarish, davlat xaridlarining shaffofligini taʼminlash, davlat arxitektura nazoratini kuchaytirish va sohani raqamlashtirish boʻyicha amalga oshirilayotgan ishlar oʻrganildi.
Jumladan, korrupsiyaviy xavflarni funksional baholash natijasida 95 ta past, 10 ta oʻrta va 1 ta yuqori xavfli yoʻnalish aniqlangan. Shuningdek, davlat arxitektura nazorati tadbirlari davomida 1,65 mingta qonunbuzilish holati hamda 1,1 mingta oʻzboshimchalik bilan qurilgan bino va inshoot aniqlangan. Mazkur holatlar boʻyicha tegishli choralar koʻrilib, 624 ta holatda maʼmuriy choralar qoʻllanilgan, jarimalarning umumiy miqdori 68,6 mlrd soʻmni tashkil etgan.
Davlat xaridlari sohasida “Masofaviy audit” mexanizmidan foydalanish natijasida 3 mlrd soʻmlik tenderda qonunbuzilishning oldi olingan, 869,5 mln soʻmlik qonunbuzilish materiallari huquqni muhofaza qiluvchi organlarga yuborilgan.
Majlisda qurilish sohasida korrupsiyaviy xavflarni kamaytirishda normativ talablarning aniq va tushunarli boʻlishiga ham alohida eʼtibor qaratildi. Vazirlik tomonidan 105 ta eskirgan normativ-texnik hujjat qayta ishlangan, 76 ta hujjatning majburiy maqomi bekor qilinib, maʼlumot uchun tavsiyaviy toifaga oʻtkazilgan.
Muhokama yakunlari boʻyicha vazirlikka korrupsiyaviy xavflarni muntazam qayta baholash, yuqori xavfli yoʻnalishlar boʻyicha nazorat mexanizmlarini kuchaytirish, manfaatlar toʻqnashuvi toʻgʻrisidagi deklaratsiyalarning haqqoniyligi va toʻliqligini tahlil qilish, davlat xaridlarida shaffoflikni taʼminlash, arxitektura nazoratida aniqlangan qonunbuzilishlarning tizimli sabablarini bartaraf etish hamda raqamli nazorat mexanizmlarining samaradorligini oshirish boʻyicha vazifalar belgilandi.
