Konferensiya Oliy Majlis Senati va Parlamentlararo ittifoq hamkorligida oʻtkaziladi. Unda 183 mamlakat, 15 xalqaro tashkilot vakillari hamda 50 ga yaqin doimiy kuzatuvchi ishtirok etadi.
Tadbir doirasida oltita sessiya oʻtkazilishi rejalashtirilgan. Shuningdek, “Barqaror rivojlanish maqsadlariga erishishda parlamentlarning ishtiroki” mavzusida maxsus ochiq sessiya tashkil etiladi.
Soʻnggi yillarda mamlakat parlament diplomatiyasini tashqi siyosatning muhim yoʻnalishlaridan biri sifatida rivojlantirib, xorijiy parlamentlar va xalqaro parlament tashkilotlari bilan aloqalarni kengaytirmoqda.
Konferensiyaning Samarqandda oʻtkazilishi Oʻzbekistonning xalqaro parlamentlararo muloqotdagi faolligi ortib borayotganini koʻrsatadi.
Ayniqsa, yosh parlamentariylarning xalqaro muloqot maydonida birlashtirilishi dolzarb masalalarni yangi avlod vakillari nuqtayi nazaridan muhokama qilish imkonini beradi. Inson huquqlari, adolat, barqaror rivojlanish va parlamentlarning jamiyat oldidagi masʼuliyati kabi mavzular konferensiyaning asosiy kun tartibini tashkil etadi.
