Fuqarolarning buzilgan huquqlari adliya organlari tomonidan tiklanmoqda

Joriy yilning 13 aprel kuni davlatimiz rahbarining Farmoniga asosan hududlarda tumanlar (shaharlar) Adliya bo‘limlari tashkil etilib, ularning faoliyati yo‘lga qo‘yildi.

Toshkent viloyatining tuman va shaharlaridagi Adliya bo‘limlari tomonidan o‘tgan davr mobaynida bir qator ishlar amalga oshirildi.

Jumladan, Adliya bo‘limlarining Farmonda belgilangan asosiy vazifalaridan biri hisoblangan inson huquqlarini himoya qilish bo‘yicha jismoniy va yuridik shaxslarning murojaatlarini ko‘rib chiqish borasida zarur chora-tadbirlar ko‘rib borilmoqda.

Ta'kidlash joizki, murojaatlarni joyida hal etish maqsadida hududlarda fuqarolar ishtirokida sayyor qabullar tashkil etishga alohida e'tibor qaratilmoqda.

O‘tgan davr mobaynida 300 ga yaqin sayyor qabullar tashkil etilib, jismoniy va yuridik shaxslarning 350 ta murojaatlari Adliya bo‘limlari tomonidan ko‘rib chiqildi. Shundan, 77 tasi qanoatlantirildi va fuqarolarning turli muammoli masalalari yuzasidan qabul qilingan 190 ta murojaatlar bo‘yicha huquqiy tushuntirish berildi. Qolgan murojaatlar ko‘rib chiqish jarayonida.

Misol uchun, Zangiota tumanida yashovchi fuqaro O‘. Bazarbayev 5 iyun kuni Adliya bo‘limiga “Hamkorlik” uy-joy mulkdorlari shirkati tomonidan oylik ish haqi to‘lab berilmayotganligidan norozi bo‘lib qilgan murojaati tuman Adliya bo‘lim tomonidan ko‘rib chiqilib, fuqaroga to‘lanmagan 2 300 000 so‘m miqdoridagi oylik ish haqi to‘liq undirib berildi.

Shuningdek, Bo‘stonliq tumanida yashovchi fuqaro A. Raxmonov 20 iyun kuni Adliya bo‘limiga uy-joyi kadastr hujjatlarini 7 yildan buyon rasmiylashtirolmayotganligidan norozi bo‘lib qilgan murojaati tuman Adliya bo‘limi tomonidan o‘rganib chiqilib, Bo‘stonliq tumani yer resurslari va ko‘chmas mulk kadastri bo‘limida uy-joyi kadastr hujjatlari rasmiylashtirib berilishi ta'minlandi.

Bundan tashqari, aholining huquqiy ongi va madaniyatini oshirish hamda qabul qilinayotgan normativ-huquqiy hujjatlarning mazmun-mohiyati va ahamiyatini ijrochilarga yetkazish maqsadida Adliya bo‘limlari tomonidan 500 dan ortiq huquqiy targ‘ibot tadbirlari o‘tkazildi.

Shu bilan birga, Toshkent viloyatining davlat notarial idoralari notariuslari tomonidan mahallalarda uchrashuvlar o‘tkazish va sayyor notarial xarakatlarni amalga oshirish tizimli ravishda davom ettirilib, o‘tgan davr mobaynida 1 800 dan ortiq sayyor notarial xarakatlar amalga oshirildi.

Hurmatli fuqarolar buzilgan huquqlaringizni tiklash bo‘yicha hududiy Adliya bo‘limlariga murojaat qilishingiz mumkin.