Toshkent davlat agrar universiteti o‘zida Germaniyadagi universitetlar filialini ochmoqda

Germaniya Federativ Respublikasining agrar sohadagi oliy ta'lim muassalari bilan xamkorlikni yanada mustahkamlash va ularning tajribasini Toshkent davlat agrar universiteti hamda uning filiallarida joriy etish maqsadida Toshkent davlat agrar universiteti rektori B.Sulaymonov boshchiligidagi delegatsiya Germaniya Federativ Respublikasiga joriy yilning 21-28 iyun kunlari tashrif buyurdi.

Delegatsiya 21-25 iyun kunlari “Vaynshtefan Triyezdorf” universitetida bo‘ldi.

Tashrifi davomida universitetlarning o‘quv rejalari, talabalarning amaliyotini tashkil etish mexanizmi, o‘qituvchilarning o‘quv yuklamasi, bitiruvchilarni ish bilan ta'minlash tizimi to‘g‘risida ma'lumotlarga ega bo‘ldi.

Shuningdek, delegatsiya 24 iyun kuni “Vaynshtefan Triyezdorf” universitetining “Agrar menejment” xalqaro magistratura dasturi doirasida tahsil olayotgan o‘zbekistonlik talabalar bilan uchrashdi. Uchrashuv davomida ularga hozirgi kunda O‘zbekiston Respublikasida amalga oshirilayotgan islohotlar, jumladan, O‘zbekiston Respublikasi Prezidentining “Toshkent davlat agrar universitetida oliy ma'lumotli kadrlar tayyorlash tizimini tubdan takomillashtirish chora-tadbirlari to‘g‘risida”gi qarori bilan tanishtirib o‘tishdi.

Tasdiqlangan reja asosida delegatsiya Leybnits universitetining IAMO institutiga 26-28 iyun kunlari tashrif buyurdi. Unda  delegatsiya IAMO instituti direktori Tomas Glauben bilan uchrashdi hamda ikki tomonlama ilmiy-akademik faoliyatni kengaytirish bo‘yicha kelishib olindi va anglashuv memorandumni imzoladi.

Ushbu tashriflar davomida Toshkent davlat agrar universiteti va uning filiallari talabalarining 6 oylik ishlab chiqarish amaliyotlarini “Vaynshtefan Triyezdorf” universitetida o‘tkazish bo‘yicha kelishib olindi. Shu bilan birga Toshkent davlat agrar universiteti va uning filiallari professor-o‘qituvchilarining malakasini oshirish, qayta tayyorlash va stajirovkasini “Vaynshtefan Triyezdorf” universitetida o‘tashini tashkil etish bo‘yicha kelishib olindi.

Bundan tashqari, Toshkent davlat agrar universiteti va uning filiallari bitiruvchi talabalarini “Vaynshtefan Triyezdorf” universitetining Xalqaro “Qishloq xo‘jaligi menejmenti” magistratura dasturiga o‘qishga yuborish rejalashtirildi.

Shu bilan birga, tashrif davomida “Vaynshtefan Triyezdorf” universiteti hamkorlari, Kamboja qishloq xo‘jaligi universiteti, Sloveniyaning Noviy Pazar universiteti, Tojikiston Milliy qishloq xo‘jaligi universiteti, Ozarboyjon davlat agrar universiteti, Ukrainaning Sumi davlat agrar universiteti va IAMO universiteti bilan, jami 6 ta “Anglashuv memorandumlar” hamda “Vaynshtefan-Triyezdorf” universiteti bilan hamkorlikni yanada kengaytirish bo‘yicha “Yo‘l xaritasi” imzolandi.