Izsiz g‘oyib bo‘lgan indoneziyalik ayol bir yarim yildan so‘ng paydo bo‘ldi

Indoneziyada bundan bir yarim yil avval dengizda yo‘qolib qolgan ayol topildi. U tirik holda bo‘lib, egnida uni oxirgi marta ko‘rishgan libos bo‘lgan. Bu haqda Dudung Pret nashri xabar berdi.

2017 yil boshida 52 yoshli Nining Sunarsix Yava orolidagi Sukabumi shahrida hordiq chiqarayotgan bo‘lgan. Guvohlarning ta'kidlashlaricha, ulkan to‘lqin uni plyajdan dengizga tortib ketgan. Ayol qichqirib yordam so‘ragan, lekin kuchli to‘fon tufayli hech kim suvga tushib unga yordam berishga botinmagan. Qutqaruvchilar Sunarsixni uzoq qidirib topa olishmagan.

Bir haftadan so‘ng Sukabumi hududida noma'lum shaxs jasadi topilgan, lekin ekspertizada jasad yo‘qolgan ayolga tegishli emasligi aniqlangan. Oradan bir necha hafta o‘tgach ayolni qidirish operatsiyasi to‘xtatilgan va Sunarsix halok bo‘lgan deb e'lon qilingan.

Ayolning oilasidagilari uning o‘lganini tan olishni istamagan. Shu yilning iyun oyida ayolning tog‘asi tushida Sunarsix yaqinlarini o‘zi yo‘qolib qolgan plyajda kutayotganini ko‘radi. Bu tush bir necha marta takrorlangach, u tushi haqida oila a'zolariga aytadi va 30 iyun kuni ular plyajga otlanishadi. Ammo qidiruv hech qanday samara bermaydi. 

Ertasi kuni ular yana plyajga kelishdi va behush holda yotgan Sunarsixni topishdi. U o‘sha yo‘qolgan kunidagi libosda edi.

Ular ayolni kasalxonaga olib kelishdi. Shifokorlar ayolning ahvoli og‘irligini, lekin tez orada oyoqqa turishini aytishdi.

Sukabumi shahri qutqaruv xizmati boshlig‘i Auliya Solixanto CNN Indonesia portaliga mazkur voqeaning haqiqatan yuz berganini tasdiqladi. Hozirda mazkur hodisa o‘rganilmoqda, lekin aniq tafsilotlar ayol o‘ziga kelib gapira boshlaganida ma'lum bo‘ladi.