Yakshanbaga oʻtar kechasi Yava dengizida Virgo Transport 8 kompaniyasining bortida jami 243 kishi boʻlgan yoʻlovchi paromi choʻkib ketdi. Hodisa oqibatida olti kishi halok boʻlgani tasdiqlangan, 107 kishi qutqarilgan. Yana 130 kishining taqdiri nomaʼlumligicha qolmoqda.
Ushbu kema shanba kuni Yava orolidagi Surabaya shahridan Kalimantan oroli (Borneo) janubidagi Banjarmasin shahri tomon yoʻlga chiqqandi. Dengizdan oʻtish chogʻida ob-havo sharoiti yomonlashgan. Kapitan kema bir tomonga qiyshayib qolgani haqida xabar bergan, kema bilan aloqa uzilib qolgach, hukumat qidiruv amaliyotini boshlagan.
Banjarmasindagi qidiruv-qutqaruv agentligiga yakshanbaga oʻtar kechasi soat 2:00 atrofida, kema bilan aloqa yoʻqolganidan ikki soat oʻtganida
Keyinroq kema agʻdarilgani va choʻkib ketgani maʼlum boʻlgan. Bortda 213 yoʻlovchi hamda ekipajning 30 nafar aʼzosi bor edi.
Qutqaruvchilarga koʻra, kema oxirgi bor aloqada boʻlganida sohildan taxminan 148 kilometr masofada harakatlangan. Voqea joyiga 4 ta kemada qutqaruv guruhlari, shuningdek, vertolyotlar yuborilgan.
Qutqaruvchilar halokatdan omon qolgan 107 kishini, shuningdek, 6 kishining jasadini suvdan chiqarib olishgan, yana 130 kishini qidirish ishlari davom etmoqda.
Yakshanba kuni Banjarmasindagi Trisakti portidagi boshqaruv punktiga kemada boʻlganlarning yuzlab qarindoshlari toʻplandi va yaqinlari haqida xabar kuta boshladi.
«Men yoʻlovchilar roʻyxatida amakimning ismini koʻrib, karaxt holatga tushdim. Ammo rasmiy shaxslar u qutqarilganini aytishganidan keyin oʻzimni biroz yengil his qila boshladim», degan ulardan biri jurnalistlarga.
Indoneziya – 17 mingdan ortiq arxipelaglardan tashkil topgan boʻlib, bu yerda parom asosiy transport vositalaridan biri hisoblanadi. Mamlakatda yoʻlovchi kemalar ishtirokidagi hodisala tez-tez roʻy berib turadi va koʻp hollarda xavfsizlik choralariga amal qilinmagani sabab sifatida keltiriladi.
Oʻtgan oyda Indoneziyaning Bali oroli yaqinida paromda yongʻin chiqishi oqibatida bir kishi halok boʻlib, 4 kishi bedarak yoʻqolgan, 211 kishi qutqarilgandi. Undan ikki hafta oldin esa «Mutira Sentos 2» nomli yana bir parom Yava oroli yaqinida yonib ketishi oqibatida besh kishi halok boʻlgandi.
