Ko‘chmas mulk obektlariga kadastr hujjatlarini rasmiylashtirish bo‘yicha narxlarni pasaytirish taklif etildi

“Mening fikrim” jamoaviy murojaatlar portalida ko‘chmas mulk obektlariga kadastr hujjatlarini rasmiylashtirish bo‘yicha davlat xizmatlari narxlarini pasaytirish haqida petitsiya paydo bo‘ldi.

Qayd etilishicha, ko‘chmas mulk obektlariga kadastr hujjatlarini rasmiylashtirish bo‘yicha davlat xizmatlarini ko‘rsatganlik uchun xizmatlarning narxini kamaytirish va aholi uchun qulaylashtirish kerak.

O‘zbekiston Respublikasi Vazirlar Mahkamasining 2017 yil 29 avgustdagi 679-sonli qaroriga ilova tarzida tasdiqlangan “Kadastr ishini tayyorlash va ko‘chmas mulk obektlariga kadastr hujjatlarini rasmiylashtirish bo‘yicha davlat xizmatlari narxlarini belgilash Tartibi”da ko‘p kvartirali uydagi kvartira hamda yakka tartibdagi turar joyga kadastr ishi mavjud bo‘lib, boshqa shaxsga o‘tkazishda to‘lanadigan pul summasi aniq ko‘rsatilmagan, deyiladi murojaatda.

“Misol tariqasida, asosan qishloq joylarda birinchi marta kadastr hujjati otaga rasmiylashtirilganda o‘rtacha bir million so‘m to‘lanadi, keyinchalik boshqa shaxsga (masalan, o‘g‘liga) qayta rasmiylashtirish zarurati tug‘ilganda ham yana shuncha miqdordagi pul summasi to‘lanishiga olib kelmoqda. Ushbu tartibning izohida, kadastr ishi yo‘qolganda (yaroqsiz holga kelganda) uning nusxasi (dublikati)ni tayyorlashning narxi ko‘chmas mulk obekti ko‘rsatkichlari o‘zgartirilmasdan, xizmatlar umumiy qiymatining 50 foizini tashkil qilishi belgilanganligini ko‘rishimiz mumkin. Vaholanki, boshqa shaxsga o‘tganda amalga oshiriladigan ishlar dublikat tayyorlashdan ko‘ra osonroqdir.

Fuqarolarimizga yanada yengillik yaratish maqsadida ko‘p kvartirali uydagi kvartira hamda yakka tartibdagi turar joyni boshqa shaxsga o‘tkazishda dastlabki to‘langan summaning 25 foizi miqdorida to‘lov to‘lanishini taklif qilamiz”, - deya yakunlanadi murojaat matni.