FHDYo alohida xodimlari EKIHning 10 baravarigacha bo‘lgan mukofot bilan rag‘batlantirilishi mumkin

Normativ-huquqiy hujjatlar loyihalarini muhokama qilish portalida FHDYo bo‘limlari faoliyatini moliyalashtirish uchun maxsus tashkil qilinadigan g‘aznachilik shaxsiy hisobvarag‘iga yo‘naltirilgan mablag‘lardan foydalanish tartibi to‘g‘risidagi nizom loyihasi e'lon qilindi.

Nizomga ko‘ra, maxsus hisobvaraq mablag‘larini tasarruf etish O‘zbekiston Respublikasining Konstitutsiyasi, O‘zbekiston Respublikasining qonunlari, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari, boshqa qonun hujjatlari hamda mazkur Nizomga muvofiq amalga oshiriladi.

O‘zbekiston Respublikasi Adliya vazirligining maxsus g‘aznachilik shaxsiy hisobvarag‘iga gerb yig‘imidan tushadigan mablag‘larning 40 foizi, shuningdek, FHDYo bo‘limlari tomonidan ko‘rsatiladigan pullik xizmatlar Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining maxsus tashkil qilinadigan g‘aznachilik shaxsiy hisobvarag‘iga yo‘naltiriladi va faqat FHDYo bo‘limlarining moddiy-texnik bazasini mustahkamlash bo‘yicha tadbirlari, xodimlarining uzoq muddat xizmat qilgani uchun ish haqiga ustama haq to‘lash va martaba darajalari uchun qo‘shimchalariga, shuningdek, ularni moddiy rag‘batlantirishga (lavozim maoshining va mukofotlarning 100 foizi miqdorigacha shaxsiy ustamalar) ishlatiladi.

Maxsus hisobvaraq daromadlari quyidagilar hisobidan shakllantiriladi:

O‘zbekiston Respublikasi Adliya vazirligining maxsus g‘aznachilik shaxsiy hisobvarag‘iga gerb yig‘imidan tushadigan mablag‘larning 40 foizi;
FHDYo bo‘limlari tomonidan pullik xizmatlar ko‘rsatishdan tushadigan mablag‘larning 100 foizi.

Mablag‘lar tuman (shahar) mahalliy byudjyetlari uchun ochilgan tegishli (25 razryadli 4014 Taqsimlanishi nazarda tutilgan mablag‘lar (tranzit)) xisobvaraqlar orqali Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari uchun ochilgan (27 razryadli 4014 Taqsimlanishi nazarda tutilgan mablag‘lar (tranzit)) maxsus hisobvaraqqa kelib tushadi.

Maxsus hisobvaraqdagi mablag‘lar quyidagilarga yo‘naltiriladi:

FHDYo bo‘limlari xodimlarining uzoq muddat xizmat qilgani uchun ish haqiga ustama haq va martaba darajalari uchun qo‘shimchalar to‘lashga;
FHDYo bo‘limlari xodimlarini moddiy rag‘batlantirishga (lavozim maoshining 100 foizi miqdorigacha shaxsiy ustamalar va mukofotlar).
FHDYo bo‘limlarining moddiy-texnik bazasini mustahkamlash bo‘yicha tadbirlarga.

Maxsus hisobvaraqdagi mablag‘lar Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan tuman (shahar) hokimliklarining tegishli byudjyetdan tashqari shaxsiy g‘azna hisobvarag‘iga (4010 Ajratmalar hisobiga shakllanadigan vazirlik va idoralarning byudjyetdan tashqari jamg‘armalari) hududiy moliya bo‘limlari tomonidan ro‘yxatdan o‘tkazilgan xarajatlar smetasi doirasida xar oylik haqiqiy xarajatlardan kelib chiqib buyurtmanoma asosida moliyalashtirib beriladi.

Tuman (shahar) hokimliklarining tegishli byudjyetdan tashqari shaxsiy g‘azna hisobvaraqlariga maxsus hisobvaraqdan kelib tushgan mablag‘larni sarflash Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan kelishilgan (tuzilayotgan xarajatlar smetasining daromad qismi yuzasidan), tuman (shahar) moliya bo‘limlari tomonidan Byudjyet tashkilotlari va byudjyet mablag‘lari oluvchilarning xarajatlar smetasi va shtat jadvallarini tuzish, tasdiqlash va ro‘yxatdan o‘tkazish tartibi to‘g‘risidagi nizom (ro‘yxat raqami 2634, 2014 yil 15 dekabr) talablari asosida ro‘yxatdan o‘tkazilgan xarajatlar smetasiga asosan amalga oshiriladi.

Maxsus hisobvaraqdan ajratilgan mablag‘larning sarflanishi to‘g‘risidagi hisobot tuman (shahar) hokimliklari tomonidan har oyda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga taqdim etiladi.

Maxsus hisobvaraqning joriy yilda foydalanilmagan mablag‘lari O‘zbekiston Respublikasi Davlat byudjyetiga olib qo‘yilmaydi va ulardan keyingi yilda foydalaniladi.

Maxsus hisobvaraq mablag‘larini taqsimlash Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari tomonidan amalga oshiriladi.

Maxsus hisobvaraqdan FHDYo bo‘limlari xodimlarini moddiy rag‘batlantirish va ijtimoiy muhofaza qilish quyidagi shakllarda amalga oshiriladi:

lavozim maoshlariga har oylik shaxsiy ustama o‘rnatish;
bayramlarda bir martalik pul mukofoti bilan mukofotlash;
martaba darajalari hamda uzoq muddatli xizmat uchun qo‘shimcha haq va ustamalar to‘lash;
ishda muvaffaqiyatlarga erishganligi va muhim topshiriqlarni bajarganligi uchun alohida xodimlarni mukofotlash.

FHDYo bo‘limlari xodimlariga lavozim maoshlarining 100 foizigacha bo‘lgan miqdorda har oylik shaxsiy ustamalar o‘rnatiladi.

Shaxsiy ustamalar tuman (shahar) hokimining o‘rinbosarlari — tuman (shahar) xotin-qizlar qo‘mitalari raislari tomonidan belgilanadi.

FHDYo bo‘limlari xodimlari bayramlar munosabati bilan bir oylik mehnatga haq to‘lash fondi (lavozim maoshi va rag‘batlantirish koeffisenti) miqdorigacha bir martalik mukofot bilan moddiy rag‘batlantiriladi.

FHDYo bo‘limlari xodimlariga martaba darajalari hamda uzoq muddatli xizmat uchun qo‘shimcha haq va ustamalar to‘lash O‘zbekiston Respublikasi Vazirlar Mahkamasining 2018 yil 3 iyuldagi 498-son “Fuqarolik holati dalolatnomalarini yozish organlari faoliyatini tashkil etish chora-tadbirlari to‘g‘risida”gi qarorida belgilangan tartibda amalga oshiriladi.

Ishda muvaffaqiyatlarga erishganligi va muhim topshiriqlarni bajarganligi uchun FHDYo bo‘limlarining alohida xodimlari tuman (shahar) hokimi tomonidan eng kam ish haqining 10 baravari miqdorigacha bo‘lgan bir martalik mukofot bilan rag‘batlantirilishi mumkin.