2008 yildan buyon «Olmaliq kon-metallurgiya kombinati» AJga rahbarlik qilib kelgan Aleksandr Kasimovich Farmonov lavozimini tark etgan. «Kun.uz» manbasi ma'lumotiga ko‘ra, u boshqa rahbarlik lavozimiga o‘tkazilgan.
![](https://storage.kun.uz/source/itsu1.jpg)
Endilikda OKMKga 2017 yil avgustidan buyon Bekoboddagi «O‘zbekiston metallurgiya kombinati» aksiyadorlik jamiyatiga bosh direktor bo‘lib kelgan Abdullo Xolmurodovich Xursanov rahbarlik qiladi.
Abdullo Xursanov 1966 yilda tug‘ilgan. 1991 yilda Toshkent arxitektura-qurilish institutini, 2005 yilda Toshkent davlat yuridik institutini tamomlagan.
![](http://storage.kun.uz/source/1/jH69GCoziT2r_Mf2PekPjkSPViZ0YpLf.jpg)
U «O‘zbekiston metallurgiya kombinati» rahbarligiga kelishdan oldin «Navoiy tog‘-metallurgiya kombinati» davlat korxonasi bosh direktorining istiqboldagi rivojlanish va investitsiyalar bo‘yicha o‘rinbosari lavozimida ishlagandi.
1958 yilda Toshkent viloyatida tug‘ilgan Aleksandr Farmonov 1975 yildan buyon metallurgiya sanoatida ishlab kelgan. U 1985-1995 yillarda Bekobod sement kombinatida direktor bo‘lgan, 1995 yildan 2008 yilgacha «O‘zbekiston metallurgiya kombinati»ga rahbarlik qilgan, 2008 yilda «Olmaliq tog‘-metallurgiya kombinati» OAJ bosh direktori, 2017 yildan «Olmaliq KMK» AJ boshqaruvi raisi bo‘lgan.