WikiLeaks asoschisi Julian Assanj Londondagi Ekvador elchixonasini tark etishga tayyor, u bu yerda 2012 yildan beri yashirinib kelmoqda. Bu haqda Bloomberg vaziyatdan xabardor ikki manbaga asosan xabar berdi.
Agentlikning ma'lumotlariga ko‘ra, Assanj so‘nggi vaqtlarda sog‘lig‘i yomonlashgani sababli bunday qarorni qabul qilgan. U Buyuk Britaniyada hamon hibsga olinishi mumkin, shuningdek, AQShdagi prokurorlar unga maxfiy ma'lumotlarni oshkor qilish bo‘yicha ayblovlar qo‘yishi ehtimolga yaqin.
Ta'kidlanishicha, WikiLeaks asoschisi bir necha variantga ega: u Buyuk Britaniyadagi shifoxonaga yo‘l olishi, mamlakatdan qochishga urinib ko‘rishi yoki sudda hibsga olinishi bo‘yicha qarorga qarshi chiqishi mumkin.
Eslatib o‘tamiz, avvalroq Ekvador prezidenti Assanj bo‘yicha bayonot bergandi.
