Madaniyat va san'at sohasida davlat-xususiy sheriklik qanday shakllarda amalga oshiriladi?

Normativ-huquqiy hujjatlar loyihalari muhokamasi portalida Vazirlar Mahkamasining “Madaniyat va san'at sohasida davlat-xususiy sheriklikni amalga oshirish chora-tadbirlari to‘g‘risida”gi qarori loyihasi e'lon qilindi.

Hujjat bilan nodavlat madaniyat va san'at muassasalarini tashkil etish maqsadida bo‘sh turgan yer uchastkalarini va bo‘sh turgan davlat mulki obektlarini bepul asosda tadbirkorlik sub'yektlari bilan davlat-xususiy sheriklik to‘g‘risida uch tomonlama bitim tuzishga ruxsat berilishi mumkin.

Madaniyat vaziriga, Qoraqalpog‘iston Respublikasi Vazirlar Kengashi Raisiga, viloyatlar va Toshkent shahri hokimlariga davlat-xususiy sheriklik to‘g‘risidagi bitimlar o‘z vaqtida va samarali amalga oshirilishi hamda xususiy sheriklar tomonidan o‘z zimmalariga olingan majburiyatlarga rioya qilinishi uchun shaxsiy mas'uliyat yuklanadi.

Belgilanishicha, bo‘sh turgan yer uchastkalarini va bo‘sh turgan davlat mulki obektlarini bepul asosda olgan, davlat-xususiy sheriklik to‘g‘risida bitim tuzish xohishini bildirmagan tadbirkorlik sub'yektlariga imtiyozli kreditlar ajratilmaydi.

Tijorat banklari rahbarlariga tijorat banklari bilan tadbirkorlik sub'yektlari o‘rtasida 10 yil muddatga, shu jumladan, 3 yillik imtiyozli davr bilan yillik 7 foiz stavka bo‘yicha kredit shartnomalari belgilangan tartibda tuzilishini ta'minlash va kredit liniyalari ochish to‘g‘risidagi bitimlarga muvofiq pul mablag‘larini olish uchun zarur buyurtmanomalarni O‘zbekiston Respublikasi Vazirlar Mahkamasi huzuridagi O‘zbekiston Respublikasining rivojlanish davlat dasturlarini moliyalashtirish jamg‘armasiga taqdim etish tavsiya qilinadi.

O‘zbekiston Respublikasi Investitsiyalar bo‘yicha davlat qo‘mitasi, Moliya vazirligi, Iqtisodiyot vazirligi nodavlat madaniyat va san'at muassasalarini rivojlantirish va davlat-xususiy sheriklikni rivojlantirish bo‘yicha tadbirlarni moliyalashtirish uchun bir oy muddatda tadbirkorlik sub'yektlariga imtiyozli kredit berishning keyingi bosqichlarini moliyalashtirishning aniq manbalari, hajmlari va muddatlarini belgilaydi.

Madaniyat vazirligiga Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari bilan birgalikda ikki hafta muddatda nodavlat madaniyat va san'at muassasalari tashkil etish maqsadida foydalanilishi mumkin bo‘lgan bo‘sh turgan yer uchastkalarini va bo‘sh turgan davlat mulki obektlarini shu jumladan ishlamaydigan va but qilinmagan davlat madaniyat va san'at muassasalarini bepul asosda tadbirkorlik sub'yektlariga berish yuzasidan davlat-xususiy sheriklik to‘g‘risida namunaviy bitim loyihasini ishlab chiqadi.

Qayd etilishicha, davlat-xususiy sheriklik quyidagi prinsiplarga asoslanadi:

davlat-xususiy sheriklik to‘g‘risidagi axborotning ochiqligi va qulayligi, bundan davlat sirini va qonun bilan qo‘riqlanadigan boshqa sirni tashkil qilgan ma'lumotlar mustasno;

kamsitishning yo‘qligi, bitim tomonlarining teng huquqliligi;

tomonlarning bitim bo‘yicha majburiyatlarni vijdonan bajarishi;

xavf-xatarlar va majburiyatlarning bitim tomonlari o‘rtasida adolatli taqsimlanishi;

davlat-xususiy sheriklik tomonlari o‘zaro munosabatlarining shartnomada kelishib olingan asosi.

Davlat-xususiy sheriklik quyidagi shakllarda amalga oshiriladi:

madaniyat va san'at muassasalari binolarini qurish maqsadida doimiy foydalanish uchun yer uchastkalarini bepul taqdim etish;

davlat mulki bo‘lgan bo‘sh turgan ko‘chmas mulk obektlarini, shu jumladan ishlamaydigan davlat madaniyat va san'at muassasalarining binolarini «nol» xarid qiymati bo‘yicha realizatsiya qilish;

but qilinmagan davlat madaniyat va san'at muassasalarining foydalanilmaydigan binolari yoki korpuslarini uzoq muddat bepul foydalanish uchun xususiy sheriklarga o‘tkazish;

ishlab turgan davlat madaniyat va san'at muassasalari hududidagi yer uchastkalarini nodavlat madaniyat va san'at muassasalari hamda ularga xizmat ko‘rsatuvchi binolarini qurish uchun doimiy foydalanishga bepul berish;

mavjud davlat madaniyat va san'at muassasalarini qayta qurish va jihozlash hamda keyinchalik otaliqqa olish sharti bilan nodavlat madaniyat va san'at muassasalari obektlarini qurish uchun yer uchastkalarini bepul taqdim etish;

konsessiya asosida qurish, qayta qurish va jihozlash uchun yer uchastkasi yoki bino ajratish;

xususiy sherik mulki negizida tashkil etilgan madaniyat va san'at nodavlat muassasalarini moddiy-texnik va moliyaviy jihatdan ta'minlash;

madaniyat va san'at nodavlat muassasalarini moddiy-texnik va uslubiy jihatdan ta'minlash;

otaliq shaklidagi filantropik faoliyat.

Davlat-xususiy sheriklik tanlov asosida amalga oshiriladi, bundan ushbu bandning sakkizinchi-o‘ninchi xatboshilarida nazarda tutilgan hollar mustasno.