Maqsadli doktoranturani tugatganlar o‘qishga yuborgan muassasa va tashkilot ixtiyoriga qaytishlari shart bo‘ladi

Normativ-huquqiy hujjatlar loyihalari muhokamasi portalida Oliy malakali ilmiy va ilmiy-pedagog kadrlarni maqsadli tayyorlash tartibi to‘g‘risida nizom loyihasi e'lon qilindi.

Qayd etilishicha, oliy malakali ilmiy va ilmiy-pedagog kadrlar tayyorlashning asosiy shakllaridan biri idora ichida, idoralararo va davlatlararo maqsadli tayanch doktorantura va doktoranturadir.

Doktorantlarni idora ichida, idoralararo va davlatlararo maqsadli tayyorlash uchun doktorant, ularni yuboruvchi va qabul qiluvchi tashkilot o‘rtasida uch tomonlama shartnoma tuziladi. Oliy o‘quv yurtlari, ilmiy muassasa va tashkilotlar maqsadli doktoranturaga yuboriladigan shaxslar o‘rtasida tanlov o‘tkazilishini ta'minlaydi.

Maqsadli doktoranturaga doktorantlar OTM va ITMlarining tasdiqlangan qabul qilish rejalariga muvofiq va vazirlik hamda muassasalar belgilangan muddatlarda qabul qilinadilar.

Doktoranturaga kirayotgan shaxslar uchun ularni bo‘lajak o‘quv joylarida doktoranturaga tayyorlash maqsadida tayanch doktorantlarga stajyer-tadqiqotchi, doktorantlarga katta ilmiy xodim lavozim maoshi miqdorida 3 yilgacha bo‘lgan muddatda stipendiya to‘lanadi va tadqiqot olib borishlari ko‘zda tutiladi.

Davlatlararo maqsadli tayanch doktorantura va doktoranturaga kirayotgan shaxslarga xalqaro shartnomalarga asosan amalga oshiriladi.

Maqsadli doktoranturaga nomzodlarni tanlash va yuborish yuboruvchi tashkilot tomonidan amalga oshiriladi. Maqsadli doktorantura bo‘yicha hisobot olib borish maqsadli doktoranturani amalga oshirayotgan tashkilot zimmasiga yuklatiladi.

Maqsadli doktoranturani tugatgan mutaxassislar ularni o‘qishga yuborgan oliy o‘quv yurti, ilmiy muassasa va tashkilot ixtiyoriga qaytishlari shart.

Maqsadli doktoranturani tugatib oliy o‘quv yurti, ilmiy muassasa va tashkilot ixtiyoriga qaytmagan shaxslardan shartnomada belgilangan alohida hollardan tashqari o‘qish bilan bog‘liq sarf-xarajatlar undirib olinadi.

Maqsadli doktorantura nufuzli ilmiy maktablar va laboratoriya-tadqiqot bazalari, Kollegial organga yoki ilmiy, ilmiy-texnikaviy kengashga ega bo‘lgan yetakchi OTM, ITM, idora va tashkilotlari qoshida fan va texnikaning eng muhim sohalari bo‘yicha oliy malakali ilmiy va ilmiy-pedagog kadrlar tayyorlash maqsadida, yetakchi idora va tashkilotlarning muammolarini yechish, rivojlantirish, takomillashtirish, davlat ilmiy-texnika dasturlarini hamda fan va texnikaning ustuvor yo‘nalishlarini amalga oshirish maqsadida tashkil etiladi.

Innovatsion rivojlanish vazirligi Fanlar akademiyasi, vazirlik va idoralardagi doktoranturalar faoliyatini nazorat qilib boradi va ilmiy-uslubiy rahbarlik qiladi. Fanlar akademiyasi, vazirlik, idora va tashkilotlar Innovatsion rivojlanish vazirligiga doktorantura faoliyati to‘g‘risidagi hisobotlarni 5 iyun va 5 dekabrgacha bo‘lgan muddatda berib boradilar.

Doktoranturada o‘qish muddati ilmiy-pedagogik ish stajiga qo‘shiladi.

Doktorantlar qonunchilik bilan belgilangan hollardan tashqari butun o‘qish davri davomida ilmiy va ilmiy-pedagogik faoliyat bilan bog‘liq bo‘lmagan ishlarga jalb qilinmaydilar.