Ochilboy Ramatov Qozog‘istondagi portning taqdimotida ishtirok etdi

O‘zbekiston bosh vazirining birinchi o‘rinbosari Ochilboy Ramatov Qozog‘iston prezidentining ishtirokida Kurik porti parom majmuasi - multimodal transport xabi taqdimoti munosabati bilan tashkil etilgan tantanali tadbirda ishtirok etdi. Bu haqda Praym xabar bermoqda.

«Davlatlarimiz rahbarlarining sa'y-harakatlari tufayli Qozog‘iston va O‘zbekiston o‘rtasidagi savdo aylanmasi joriy yilning o‘tgan davrida 2017 yilning shu davri bilan taqqoslaganda 50 foizga oshdi. Lekin bu hali chegara emas. Bizda foydalanilmayotgan katta imkoniyatlar va tashqi iqtisodiy faoliyat hamda transportda zaxira bor», - dedi Ramatov tadbir davomida. 

Uning ta'kidlashicha, «Qozog‘iston va O‘zbekiston temir yo‘l ma'muriyatlarining faol o‘zaro hamkorligi savdo va tovar aylanmasining o‘sishiga hissa qo‘shmoqda». «O‘zbekiston Qozog‘iston va boshqa Kaspiy davlatlarining logistika va transport infratuzilmasi rivojlanayotganini qo‘llab-quvvatlaydi», - dedi Ramatov. Uning qayd etishicha, Kurik portini ishga tushirish Kaspiy dengizida transport kommunikatsiyalarini rivojlantirish tarixida yangi sahifa ochadi.

Kurik porti xalqaro transport yo‘laklari tarmog‘iga kiradi. Port akvatoriyasiga temir yo‘l va avtomobil magistrallari ulangan. Temir yo‘l-parom va avtomobil majmuasining o‘tkazish quvvati yiliga 7 million tonnadan ziyod.