Ishga olib kirishni va'da qilgan firibgarga jazo tayinlandi

Joriy yilning 25 iyul kuni jinoyat ishlar bo‘yicha Farg‘ona viloyat Dang‘ara tuman sudi tomonidan X.Sotvoldiyev raisligida ochiq sayyor sud majlisi o‘tkazildi. Unda ayblanuvchi S.S. ustidan 168-moddasi (Firibgarlik) 3-qismi «b» bandi (o‘ta xavfli retsidivist tomonidan), 28,211-moddasi (pora berish) 2-qismi «a» bandi (o‘ta xavfli retsidivist tomonidan) bo‘yicha jinoyat ishi ko‘rib chiqildi.

Aniqlanishicha, S.S. 2018 yilning 12 aprel kuni fuqaro B.A. dan Farg‘ona neftni qayta ishlash zavodining «Angren-Pop» terminallaridan foydalanish direksiyasi «Avtonefttrans» avtotransport jamlanmasi Pop uchastkasi qayta tashkil etilayotganini aytib, zavodda ishlovchi tanishi orqali haydovchilik vazifasiga ishga olib kiritib qo‘yishni aytgan. Evaziga 2 300 000 so‘m pul va mehnat daftarchasi, shaxsiga oid hujjatlari nusxalarini olgan. Bunday holat, B.J. bilan ham sodir bo‘lgan. Undan 2 250 000 so‘m pul va mehnat daftarchasi, shaxsiga oid hujjatlari nusxalarini olgan.

19 aprel kuni fuqaro A.T. va B.T. bilan ko‘rishgan. B.T.dan 2 230 000 so‘m, A.T. esa 2 240 000 so‘m pul va hujjatlarni olgan.

22 aprel kuni yana xuddi shunday qilmishini davom ettirgan. M.I. ismli shaxsdan ham xuddi shunday haydovchilikka olib kirishini aytib, 3 800 000 so‘m pul olgan.

2018 yil 26 aprel kuni O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurash Departamentining Dang‘ara tuman bo‘limi hamda tuman IIB xodimlari tomonidan o‘tkazilgan vaqtda qo‘lga olingan.

Sud, dalillarni hisobga olib, S.S. ni Jinoyat kodeksining 168-moddasi 3-qismi «b» bandi va 28,211-moddasi 2-qismi «a» bandi bilan aybdor deb topdi va sutkaning soat 18:00 dan soat 08:00ga qadar chiqishni cheklashdan iborat 3 (uch) yil muddatga ozodlikni cheklash jazosi tayinladi.

Hukmdan norozi taraflar shikoyat yoki protest bildirishga haqliligi tushuntirildi.