Xitoy Suriya mojarosiga aralashishi haqidagi xabarlarni rad etdi

Xitoy hukumatining Suriya bo‘yicha maxsus vakili Se Syaoyanning ma'lum qilishicha, Suriyada XXRning harbiy ishtiroki haqidagi xabarlar mamlakat «siyosatining buzib talqin qilinishi»dir. Bu haqda RIA «Novosti» xabar bermoqda.

«So‘nggi paytlarda Xitoy Suriya mojarosida ishtirok etishga tayyorgarlik ko‘rayotgani haqida OAVda turli xabarlar paydo bo‘ldi. Bu Xitoy siyosatining buzib talqin qilinishi. Bu materiallarni e'lon qilgan arab OAV keyinchalik Xitoyning Suriyada harbiy ishtiroki yo‘qligi haqida aniqlik kiritdi. Xitoy mojaroni faqat tinch yo‘l bilan hal qilishni qat'iy qo‘llab-quvvatlaydi», - deya ma'lum qildi diplomat.

Uning qayd etishicha, o‘z so‘zlarini rasmiy siyosiy bayonot deb hisoblash mumkin. Shuningdek, Se Syaoyanning qo‘shimcha qilishicha, Xitoy terrorizmning har qanday ko‘rinishiga qat'iy qarshi chiqadi.

Eslatib o‘tamiz, avvalroq Xitoy xorijda yashovchi uyg‘urlarni qo‘rqitayotgani ma'lum qilingandi.