Pxenyan raketa poligonini demontaj qilishni to‘xtatib qo‘ygani ma'lum qilindi

Shimoliy Koreya mamlakat shimolidagi Soxe raketa poligonini demontaj qilishni to‘xtatib qo‘ydi. Bu haqda Shimoliy Koreyaning raketa-yadroviy faoliyatini sun'iy yo‘ldoshlardan olingan suratlar asosida kuzatib boruvchi 38 Notrh portali ma'lum qildi. Bu poligonda o‘z vaqtida “Xvason-15” qit'alararo ballistik raketasi sinovdan o‘tkazilgan.  

Kuzatuvchilarning ta'kidlashicha, 3 avgustdan poligonda demontaj bo‘yicha birorta ahamiyatli ish olib borilmagan. Avvalroq demontaj qilingan inshootlar qismlari hech qayerga olib chiqib ketilmagan.   

Soxeda 24 iyuldan boshlab demontaj ishlari boshlangani ma'lum qilingandi. Mutaxassislar sun'iy yo‘ldoshdan olingan ma'lumotlarga asoslanib, ishlab chiqarish binosi va raketa dvigatellarini sinashga mo‘ljallangan stend demontaj qilinganini tasdiqlashgandi. 

Soxe Shimoliy Koreyaning bosh raketa poligoni (kosmodrom deb ham ataladi) bo‘lib, undan ballistik raketalar uchirilgan. Poligon Xitoy chegarasi yaqinida, Pxenyandan shimol tomon 200 km uzoqlikda joylashgan. 

Poligonning yopilishi AQSh prezidenti Donald Tramp va Shimoliy Koreya yetakchisi Kim Chen Inning Singapurdagi uchrashuvida muhokama qilingani aytiladi.