Putinning Poroshenkoga tahdidi haqida yangi ma'lumotlar paydo bo‘ldi

Rossiya prezidenti matbuot kotibi Dmitriy Peskov «Rossiya 1» telekanaliga bergan intervyusida Vladimir Putinning ukrainalik hamkasbi Pyotr Poroshenko bilan 2015 yildagi «normand to‘rtligi» uchrashuvidagi muzokaralari haqida yangi ma'lumot berdi. Peskovning so‘zlari RIA Novosti tomonidan keltirilgan.

Suhbat chog‘ida Kreml rasmiy vakilidan muzokaralarda ishtirok etgan Fransiya sobiq prezidenti Fransua Ollandning xotiralariga izoh berish so‘raldi. Fransiya sobiq prezidenti Putin Poroshenkoga tahdid qilgani haqida yozgandi.

«Mushkul muzokaralar vaqtida hamda Ukrainada Poroshenko tomonidan keltirib chiqarilgan jangovar harakatlar davomida Putin, albatta, unga yoqimli so‘zlarni aytmagan. Siz tasavvur qilishingiz mumkinki, Putin qattiq, aniq va juda tushunarli tarzda gapirgan. Lekin, albatta, bunday tahdid bo‘lmagan», - deya ma'lum qildi Peskov.

Ollandning «Hokimiyat saboqlari» deb nomlangan xotira kitobi 2018 yilda nashr etildi. Ukrainaning Gordon.ua nashri kitobdan ba'zi qismlar tarjimalarini keltirdi. Xususan, Minskda Rossiya, Ukraina, Fransiya va Germaniya rahbarlarining uchrashuvi tasvirlangan parchalar ham taqdim etilgan.

«[Ukraina prezidenti Pyotr] Poroshenko va Putin muntazam ravishda bir-biriga baland ovozda gapirdilar. Rossiya prezidenti shunchalik asabiylashdiki, o‘z hamkasbini yanchib tashlash bilan tahdid qila boshladi. Bu Ukraina sharqida rus qo‘shinlari borligini isbotlab berdi. Putin birdan o‘ziga keldi va hissiyotlarini qo‘lga oldi», - deb yozadi Olland.

«Poroshenko o‘z mamlakatining suverenitetini qat'iyat bilan himoya qildi, Putin esa ba'zi viloyatlar uchun muxtoriyatga erishmoqchi hamda o‘t ochishni to‘xtatish rejimini yana uch haftaga ortga surmoqchi edi. U juda qat'iy edi, ayirmachilar rahbarlari bilan bevosita aloqasi yo‘qligini ta'kidlab, ular uchun qaror qabul qila olmasligini aytdi va ular bilan maslahatlashishni talab qildi», - deya davom etadi Fransiya sobiq prezidenti. 

Eslatib o‘tamiz, avvalroq Putin Poroshenkoga tahdid qilgani haqida ma'lumotlar paydo bo‘lgandi.