Maktablardagi pedagog kadrlarni attestatsiyadan o‘tkazish tartibi qayta ko‘rib chiqiladi

O‘zbekiston Respublikasi prezidenti “Xalq ta'limini boshqarish tizimini takomillashtirish bo‘yicha qo‘shimcha chora-tadbirlar to‘g‘risida”gi farmonni imzoladi.

Hujjat bilan belgilab qo‘yilishicha, Vazirlar Mahkamasi huzuridagi Ta'lim sifatini nazorat qilish davlat inspeksiyasi Xalq ta'limi vazirligi bilan birgalikda 2019 yil 1 yanvarga qadar muddatda:

tegishli fanni o‘qitish bo‘yicha bilim va ko‘nikma darajasini – pedagoglar malakasini aniqlashning asosiy mezoni sifatida belgilab, umumta'lim muassasalarining pedagog kadrlarini attestatsiyadan o‘tkazish tartibini qayta ko‘rib chiqadi;

pedagogik mahorat va bilim darajasini doimiy oshirib borishga ko‘maklashuvchi ilg‘or xorijiy tajribani hisobga olgan holda, xalq ta'limi tizimi xodimlarining bilim darajasiga oid malaka toifalari va talablarini takomillashtirish bo‘yicha aniq takliflar kiritadi;

umumta'lim muassasalari reytingini tuzish maqsadida ularning faoliyati samaradorligini baholash mezonlari tasdiqlanadi;

o‘quvchilarning bilim darajasini baholash bo‘yicha xalqaro dasturlar va tadqiqotlarda (PISA, TIMSS, PIRLS va boshqalar) umumta'lim muassasalari o‘quvchilarining ishtirokini tashkil etadi.