Farmonga ko‘ra, 2027-yil 1-iyuldan umumyurisdiksiya va ma’muriy sud yo‘nalishlarida ishlarni qayta ko‘rib chiqish vakolatiga ega, yurisdiksiya hududi bir nechta ma’muriy-hududiy birliklarni qamrab oladigan hududlararo sudlar tashkil etiladi. Ular uchun jami 319 ta boshqaruv xodimi shtat birligi ajratiladi.
Shuningdek, 2027–2030-yillarda aholi soni, ishlar hajmi, sudyalarning ish yuklamasi va hududiy xususiyatlardan kelib chiqib, barcha hududlarda fuqarolik ishlari bo‘yicha tuman va shahar sudlarini tashkil etish ko‘zda tutilgan.
Jinoyat protsessida ham sud nazorati kuchaytiriladi. 2027-yil 1-iyuldan tergov sudyalariga shaxsni ushlab turishning qonuniyligi va asosliligini, gumon qilish yoki ayblov e’lon qilish uchun asoslar yetarliligini tekshirish vakolatlarini berish taklif etilgan.
Farmonda yana:
«Pretsedentlar» reyestrini joriy etish;
sudlar faoliyati ochiqligini oshirish;
sud binolarida «yagona darcha» tamoyili asosida xizmat ko‘rsatish ofislarini tashkil etish;
my.sud.uz portalini takomillashtirish va uning yangilangan mobil ilovasini ishga tushirish;
2028-yildan iqtisodiy ishlar bo‘yicha «proaktiv boshqaruv» standartini joriy etish;
juz’iy kamchiliklar tufayli arizani qaytarish amaliyotini isloh qilish;
2028-yil 1-yanvardan sud ma’murchiligi institutini joriy etish;
har yili O‘zbekistonda odil sudlov sifati indeksini e’lon qilish amaliyotini yo‘lga qo‘yish nazarda tutilgan.
Farmonning maqsadi - inson huquqlarini sud orqali himoya qilishni kuchaytirish, sudlarning mustaqilligi va ochiqligini ta’minlash, sudga murojaat qilishni soddalashtirish hamda odil sudlov sifatini oshirish ekani ta’kidlangan.
