Bu prezident farmonida belgilandi.
Hujjatga muvofiq, boshqaruv, ijtimoiy-madaniy yoki tijoratchilikdan iborat boʻlmagan boshqa vazifalarni amalga oshiradigan davlat muassasalari bundan mustasno boʻladi. Qolgan tijorat faoliyati bilan shugʻullanuvchi davlat muassasalari 2026-yil 1-dekabrga qadar xoʻjalik jamiyatlariga aylantirilishi kerak.
Bundan tashqari, raqobat muhiti shakllangan sohalarda Davlat byudjetidan moliyalashtirish manbasiga ega boʻlmagan davlat muassasalarini tashkil etish taqiqlanadi. Mudofaa va xavfsizlik bilan bogʻliq muassasalar hamda Prezident qarorlarida alohida nazarda tutilgan holatlar bundan mustasno.
Davlat ishtirokidagi korxonalar tizimida muassasa shaklida faoliyat yuritayotgan nosohaviy tashkilotlar ham korxonalar tarkibidan chiqariladi. Ular xoʻjalik jamiyatlariga aylantirilib, ommaviy savdolarga qoʻyiladi.
Farmon bilan xususiylashtirish jarayonlariga oid yana bir tartib belgilangan. Agar xususiylashtirish subyektiga tegishli yer uchastkasining bir qismi yoʻl yoki muhandislik-kommunikatsiya tarmoqlarining muhofaza zonasiga tushsa, yerning muhofaza zonasidan tashqarida joylashgan qismini xususiylashtirishga ruxsat beriladi.
Shuningdek, davlat ulushi mavjud tijorat banklari tumanlarda tadbirkorlarga sunʼiy intellektdan foydalangan holda «loyihalar fabrikasi» tamoyili asosida yangi loyihalar taklif qiladi. Bunda loyihalarni, birinchi navbatda, savdoga qoʻyilgan davlat mulki obyektlari va yer uchastkalari negizida amalga oshirish nazarda tutilgan.
Yana bir oʻzgarish 2026-yil 1-oktabrdan kuchga kiradi. Shu sanadan ustav kapitalida davlat ulushi 50 foizdan ortiq boʻlgan yuridik shaxslar, shuningdek, ularning ulushi 50 foizdan ortiq boʻlgan yuridik shaxslarga tegishli qimmatli qogʻozlarga boʻlgan huquqlarni hisobga olish Qimmatli qogʻozlar markaziy depozitariysi tomonidan amalga oshiriladi.
