Rossiya Yaponiyaga taklif bilan chiqdi

Rossiya prezidenti Vladimir Putin Yaponiya bosh vaziri Sindzo Abega 2018 yil oxirigacha tinchlik shartnomasini dastlabki shartlarsiz imzolash bo‘yicha taklif bilan chiqdi. U 12 sentabr, chorshanba kuni Sharqiy iqtisodiy forum doirasida shunday bayonot berdi.

«Menga bir g‘oya keldi: keling, tinchlik shartnomasini imzolaymiz, lekin hozir emas, yil oxirigacha. Har qanday dastlabki shartlarsiz», - dedi Rossiya yetakchisi. Uning so‘zlariga ko‘ra, shartnoma asosida mamlakatlar bahsli masalalarni hal qilishda davom etadi.

«Tabiiyki, bu bizga 70 yildan beri hal qila olmayotgan barcha muammolarga yechim topishda yordam beradi», - deya qo‘shimcha qilib o‘tdi u.

Avvalroq, Abe Sharqiy iqtisodiy forum doirasida Moskva va Tokio o‘rtasida tinchlik shartnomasining yo‘qligi g‘ayritabiiy holat ekanligini ta'kidlab o‘tdi.

Rossiya va Yaponiya o‘rtasidagi tinchlik shartnomasi 70 yildan ortiq vaqt mobaynida imzolanmayapti. Tokio Iturup, Kunashir, Shikotan va Haboman orollari qaytarib berilishini talab qilmoqda. Moskvaning fikricha, Janubiy Kurillar Ikkinchi jahon urushidan keyin SSSR tarkibiga kirgan va ularning ustidan suverenitetga shubha qilib bo‘lmaydi.

Eslatib o‘tamiz, avvalroq Yaponiya Rossiyaga protest bildirgandi.

Yaponiya hukumati bosh kotibi Yosixide Suga janubiy Kuril orollarida Ikkinchi jahon urushi yakunlanganiga bag‘ishlangan tadbirlar tufayli Rossiyaga protest bildirdi.