Fuqaro aviatsiyasi aviakorxonalaridagi o‘quv yurtlarini sertifikatlash qoidalari o‘zgaradi

Normativ-huquqiy hujjatlar loyihalari muhokamasi portalida “O‘zbekiston Respublikasi fuqaro aviatsiyasining aviakorxonalaridagi o‘quv yurtlarini sertifikatlash qoidalariga o‘zgartirishlar kiritish to‘g‘risida”gi loyiha joylashtirildi.

O‘zbekiston Respublikasi fuqaro aviatsiyasining aviakorxonalaridagi o‘quv yurtlarini sertifikatlash qoidalariga kiritilayotgan o‘zgartirishlar:
 
1. 7–band quyidagi tahrirda bayon etiladi:

“7. Birinchi marta sertifikatni olish uchun ariza “Davavianazorat” inspeksiyasiga topshiriladi. Mazkur ariza “Davavianazorat” inspeksiyasi tomonidan o‘ttiz ish kunidan oshmaydigan muddatda ko‘rib chiqiladi.

“Davavianazorat” inspeksiyasiga kelib tushgan ariza o‘sha kunning o‘zida ro‘yxatdan o‘tkazilishi lozim. "Davavianazorat" inspeksiyasi arizachiga ariza ro‘yxatdan o‘tkazilganligini tasdiqlovchi tegishli hujjat (belgi) berishi, ariza elektron shaklda berilgan taqdirda esa, ariza ro‘yxatdan o‘tkazilganligini “Davavianazorat” inspeksiyasining rasmiy veb-saytidagi elektron xabarlarga tayanib, yoki qonun hujjatlarida nazarda tutilgan boshqa usul bilan tasdiqlashi shart.

“Davavianazorat” inspeksiyasida arizani ro‘yxatdan o‘tkazishni rad etishga yo‘l qo‘yilmaydi.”.
 
2. 16–band quyidagi tahrirda bayon etiladi:

“16. Ariza bilan birga taqdim etilgan hujjatlarni dastlabki baholash natijalari salbiy natija berganda, kamchiliklarni bartaraf etish uchun besh ish kunidan kam bo‘lmagan vaqt “Davavianazorat” inspeksiyasi tomonidan beriladi.”.
 
3. 25–bandda “ikki oy” degan so‘zlar “o‘ttiz ish kuni” degan so‘zlar bilan almashtiriladi.
 
4. 38–band quyidagi tahrirda bayon etiladi:

“38.  Sertifikatning amal qilish muddatini bekor qilish yoki uni to‘xtatib qo‘yish to‘g‘risidagi qaror “Davavianazorat” inspeksiyasi tomonidan qabul qilinadi va bir ish kunidan kechiktirmay yozma ravishda o‘quv yurtiga xabar beradi.”.
 
5. 40–band quyidagi tahrirda bayon etiladi:

“40. Sertifikat harakati tugatilishiga asos bo‘lgan sabablar bartaraf etilgandan so‘ng va kamchiliklarni bartaraf etish to‘g‘risida hisobot taqdim etilgandan keyin Sertifikat harakatini yangilash to‘g‘risida “Davavianazorat” inspeksiyasining qarori qabul qilinadi. “Davavianazorat” inspeksiyasi tegishli qaror qabul qilingan kunidan boshlab bir ish kunidan kechiktirmay yozma ravishda buyurtmachiga bu haqda xabar beradi.”.